Джон Моллой диэн учуонай «Эр дьон кэргэн ылалларыгар кинини буолбакка тоҕо атыттары талалларый?» (Why Men Marry Some Women And Not Others) диэн кинигэтигэр 3, 5 тыһыынча эр киһиттэн ыйыталаһан, туох киритиэрийинэн ойохторун талбыттарын туһунан суруйар.
 

Кэргэн буоларга аһара кырасыабай

Моллой эр дьонтон ойохторо хайдаҕын туһунан ыйыппытыгар баара эрэ 20%-нара «кини ороҥҥо үчүгэй» эбэтэр «олус кэрэ» диэн эппиттэр, онтон атыттара бары ойохторун майгыта үчүгэйин туһунан кэпсээбиттэр. Оттон «кинини хайа да сиргэ, хампаанньаҕа киһи кыбыстыбакка илдьэ сылдьар кыахтаах» диэҥҥэ бары кэриэтэ сөбүлэспиттэр. Эр дьон 30%-нара ойохторун «төрөппүттэрбит (уонна да атын аймахтарбыт) сөбүлээбиттэрэ уонна ылыммыттара — ойохпутун таларбытыгар быһаарар оруолу ылбыта» диэбиттэр. Үксүгүт сэрэйбит буолуохтаах, төрөппүттэр уонна аймахтар уолларын аттыгар ханнык да «секс-бомба» сылдьарын сөбүлээбэт буоллахтара.

Эр дьон дьахтар имэҥнээх дуу, имэҥэ суох дуу буоларын былыр-былыргыттан аахайбаттар эбит. «Ойох аһара имэҥнээх буолуо суохтаах. Тоҕо диэтэргит, эр киһи иһигэр «чахчы, бэйэм оҕолорбун иитэбин» диэн эрэллээх буолуон баҕарар». Бу туһунан психолог, доктор Джейн Маккартни суруйар.

Күүстээх аҥаары ордук дьахтар үтүөтэ, эйэҕэһэ, муударайа абылыыр. Эрийсиик, солуута суох, мээнэ күлбүт-үөрбүт дьахталлары эр дьон үксүгэр «эрэллээх дьүөгэ», көссүү оҥостоллор, оттон ойох ыларга ыксаабаттар. Омук артыыскаларын даҕаны ылан көрүҥ. Холобур, Кэмерон Диаз хас биирдии эр киһитин сүүһүгэр маннык диэн сурулла сылдьар курдук: «Кини миигин кытары төһө өр буолуон билбэппин, кырасыабайа бэрт». Эр киһи, биллэн турар, үчүгэй бөгүүрэлээх, томтоҕор түөстээх, толору самыылаах, ыраас, чэнчис, бэйэтин көрүнэр дьахтары ордорор. Ол да буоллар, бэйэтигэр барсар, дьүөрэлии ол эбэтэр бэйэтиттэн ордуга суох дьахтары талан ылар үһү.

Муора күнүн-дьылын кэтэһимэҥ

Кыыһынан кырдьыы өссө биир төрүөтэ дьахталлар наһаа күүскэ ойох тахсыахтарын баҕараллара буолар. Наһаа ойох тахсыан баҕарбыт дьахтар ис санаатын эр киһиэхэ аһаҕастык эппэт, саҥата суох күүтэ сатыы-сатыы, хомой да хомой, кыыһыр да кыыһыр буолар эбит. Оттон кэргэннээх дьахталлар 73%-нара күнү-дьылы күүтэн олорбокко, эрдэрин бэйэлэрэ күүстэринэн ойох ылларбыттар диэн буолар.
 Уопсай ыстатыыстыканы көрдөххө, эр дьон үгүстэрэ дьахтары кытта билсибиттэрэ 22 ыйыгар «миэхэ ойох таҕыс» диэн этии киллэрэллэр. Онтон салгыы кэлэр 3, 5 сылга «ойох ыл» дииллэрэ аҕыйыыр эбит. Өскөтүн сэттэ сылы быһа «сылдьан» баран ойох ылбатах буоллаҕына – бу киһи инникитин эйигинниин холбоһоро саарбах

Онон эйигин көрсүөн иннинэ атын дьахтардыын саахсата суох олоро сылдьыбыт, ол үчүгэйин билбит эр киһини кытары билсэ сылдьар буоллаххына, уот ааныттан «мин ойох тахсыахпын, саахсаланыахпын баҕарабын, гражданскайынан олорору ахсарбаппын» диэхтээххит. Тоҕо диэтэргит, маннык эр киһи эн тугу баҕараргын эрдэттэн билиэхтээх. Тута куотан хааллаҕына санаарҕаамаҥ, таптыыр, сыаналыыр буоллаҕына, ханна да барыа суоҕа. Уйулҕа үөрэхтээхтэрэ итинник сүбэлииллэр.

Кэтээн көрүү түмүгэр, дьиктитэ диэн, эр дьон ойохторо аһара үлэһит буоларын сөбүлээбэттэр. Хамначчыт курдук «ээҕи» кытары сылдьар дьахтары кытта ким да бииргэлэһиэн баҕарбат. Ол оннугар дьахтар бэйэтин билинэр, эр киһини кытта тэҥ таһымҥа турар, бэйэтин убаастыыр буолуохтаах.
Эр киһиэхэ саахсата суох олоруу диэн – онуоха-маныаха диэри быһаарыныы. Ол эбэтэр, эр киһи бу дьахтары «ойох ылыахпын ситэри таптаабаппын быһыылаах» диэн саарбахтыыр, саҥаттан саҥа дьахтары сэмээр көрдүүр. Оттон дьахталлар эрэйдээхтэр эр киһи «саахсата суох бииргэ олорон көрүөххэ» диэтэҕинэ, тута ойох тахсан ырааппыт курдук сананаахтыыллар эбэтэр ойох тахсарга улахан хардыы курдук ааҕыналлар эбит.

29.11.2012 15:20 | Автор: Алла Черемкина http://www.kyym.ru сайттан