Сахаларга дьиэ маһын кэрдии туспа үгэстэрдээх. Ол курдук, баай хара тыа иччититтэн көнө, суон, чиргэл өһүө маһын кэрдэригэр эр киһи бу курдук саҥарар:
Баай хара тыаттан
Айыы киһитэ буолан,
Алаһа дьиэни тэринээри,
Ааттаһан - көрдөһөн эрэбин.
Атыҥырыы көрүмэ,
Антах хайыһыма,
Бэттэх көрөн
Мичик гын,
Кэскилбин тэринэрбэр,
Олохпун оҥосторбор,
Үс үйэ тухары түүнүгүрбэккэ
Үрдүбүтүгэр дурда - хахха буол!
Онтон кытыйаттан хамыйаҕынан суораты баһан ылан, илиитин иһинэн өһүө буолар мастары биһэр. Мастары илин өттүгэр суулларан мутугун, хатырыгын ыраастаан туспа дьаарыстыыллар. Суулларбыт дьиэ мастарын үс сыл устата куурдаллар.
А.С. Федоров "Өбүгэ сиэрэ - туома" кинигэтиттэн. Бичик - 2011.