Кумааҕыттан оҥоһуллубут элбэх сымыыты хаалыыр иһити (сымыыт ячейкатын) киһи барыта билэр. Дьэ бу тэрил оҕуруокка туһата баһаам.
 

Көнөтүк олордуллар

Сымыыттар уйаларын икки арда бэйэ-бэйэлэриттэн 15 сантиметр тэйиччи буоланнар, таһырдьа үүнэр бытархай оҕуруот аһынкирээдэтиноҥорорго табыгастаах. Буоргутун үчүгэйдик таҥастаан, ол эбэтэр тиэрэн, бытарытан-илдьиритэн баран, ячейканан баттаталаан ылын. Биир тэҥник түспүт лууҥкаларга марганцовкалаах итии уута кутан баран, сүбүөкүлэ, моркуоп, укуруоп, луук, уо.д.а. сиэмэлэрин анньан кэбиһиҥ. Сотору үнүгэстэр параадка турар саллааттар курдук биир тэҥник уонна сүрдээх кырасыабайдык сэрбэһэн тахсыахтара.

Сылаас кирээдэлэр

Урут моркубу уонна сүбүөкүлэни хойутаан (ыам ыйын бүтүүтүгэр, бэс ыйын саҥатыгар) олордор этибит. Билигин сөптөх бүрүйэр матырыйаал элбээн, икки нэдиэлэнэн эрдэ олордор буолбуттар.

Биллэн турар, ирбэт тоҥ оҕо оонньуута буолбатах, сир син биир сылыйар кэмигэр сылыйар. Ити иһин, сымыыт хаалыыр кумааҕы иһитинэн "сылаас кирээдэни" оҥорор көдьүүстээх.

Ячейка түгэхтэрин тарбаҕынан тэһиллэр уонна буор кутан онно моркуоп сиэмэтин баттанар. Аҕыйах хонук дьиэҕэ оннук туруоруллар, онтон таһырдьа таһаарыллар. Эрдэ эмиэ ячейканан баттаан оҥоһуллубут лууҥкаларга марганцовкалаах итии ууну кутуллар итиэннэ онно "сылаас кирээдэни" угуллар. Үрдүнэн сылытар материалынан (холобур "Нутросилынан" бүрүйэн кэбиһиллэр. Ячейка аннынан күн көрбөт буолан сыыс от тахсыбат. Кэлин илдьирийэн буору кытта буор буолар.

Уопсайынан моркуобу, сүбүөкүлэни эрэ буолбатах, аһаҕас буорга үүнэр ханнык баҕарар оҕуруот аһын олордон баран, бастакы икки нэдиэлэ устата (сайыҥҥылыы ичигэс күннэр саҕаланыахтарыгар диэри) сабан туруорар ордук. Ити үүнээйини салгынтан, тыалтан - куустан харыстыаҕа, ону таһынан сиэмэ силис тардан үүнэригэр - сайдарыгар табыгастаах усулуобуйаны хааччыйыаҕа.

Раиса Сибирякова бэлэмнээһтинэ. "Саха ыала" ("Саха сирэ" хаһыат дьиэ кэргэҥҥэ аналлаах сыһыарыыта) Ыам ыйын 12 күнэ