Бүрүүкэни өтүүктүөхпүн иннинэ туох материалтан тигиллибитин көрөбүт. саамай имиллэр бүрүүкэ - лүөнтэн. Маннык бүрүүкэни күүстээх уокка өтүүктүүр ордук. Холуопак өтүүктүүргэ чэпчэки эрээри имиллимтиэ. 

Сиэрис уонна твид материаллартан тигиллибит бүрүүкэни маарыллалаах эрэ өтүүктүүр эбит буоллахпытына, синтиэтикэ үгүс сырата суох  түргэнник көнөр. Бүрүүкэни түргэнник өтүүктүүргэ туох албас баарый?

Бүрүүкэни тиэрэбит, маҥнай сиэптэрин, сиһин уонна ис биэтэһин өтүүктүүбүт.

"Атахтарын" тэҥ гына үрүт үрдүгэр уурталыыбыт. Маарылланан бүрүйэн баран, илиибитинэн таптайа-таптайа, өтүүкпүтүн бүрүүкэбит устатынан сыыйа сыҕарытабыт. Кырыыларын тумнабыт.

Бүрүүкэбит "атахтарын" өтүүктүүр дуоскабыт муннугар биир-биир кэтэрдэбит уонна эргитэ сылдьан өтүүктүүбүт. Сүрүн болҕомтобутун сиэбигэр, сиһигэр уонна сомуогар уурабыт.

Бу үлэни барытын толорон баран, бүрүүкэбит кырыытын өтүүктүүбүт. Бүрүүкэ кырыыта көнө буолуохтаах. Ол инниттэн маҥнай бүрүүкэбит сурааһынын кыйа кылгас кэрчиктэри көннөрөбүт. Көнө буолууһу дии санаатахпытына, "атахтарын" үрүт үрдүгэр ууран баран, ити сурааһыннарбытын күүскэ аалан биэрэбит.

Бүрүүкэ кырыыта "сытыы" буоларыгар биир судургу албас баар. Ыстааммытын тиэрэн баран,кырыытын хаһаайыстыбаннай мыыланан сотон биэрэбит уонна үрдүгэр маарылланы ууран баран өтүүктүүбүт. Бүрүүкэбитигэр өтүүк суола хааллаҕына, уксуустаах ууга илийбит маарылланан сотобут. Бүрүүкэни, уопсайынан, ханнык баҕарар таҥаһы, өтүүктээн баран тута кэтимэн. "Сылаас" таҥас ордук имиллимтиэ буолар.

Диана Клепандина суруйуута. "Кыым" хаһыаттан. Олунньу 28 күнэ, 2013 сыл