Биллэрин курдук ханнык баҕарар үүнээйи баай ас биэрэрин туһугар кытаанах доруобай рассада олордуллуохтаах. Бэлэм рассаданы атыылаһыахха сөп эрээри, төһө тулуурдааҕа биллибэт. Ол иһин киһи бэйэтэ үүннэрбит рассадата быдан ордук буоллаҕа.
Бастатан туран почва бэлэмниибит. Сибэккигэ аналлаах буору ылар ордук, кини хомуоҕа уонна ыарыыта суох - бу эдэр үүнээйигэ олус суолталаах. Оҕуруот почватын да туттуохха сөп. Бу туһугар почваны 60-90 кыраадыска диэри итийбит духовкаҕа уган ылабыт, оччоҕуна буортулаах микроорганизмнар өлөллөр.
Помидор сиэмэтин бэлэмниибит. Гибрид сорду атыылаһар ордук, кини баай астаах уонна тулуурдаах буолар. Минеральнай уоҕурдуута суох табыллыбаппыт: рассада олордорго аналлаах "Идеал" эбэтэр "Эпин". Торф горшочектары атыылаһыахха, эбэтэр, үбү кэмчилиир сыалтан, сымыыт уурар иһиккэ сымыыт хаҕар олордуохха сөп. Кирээдэҕэ көһөрөргө табыгастаах (силистэрэ алдьамматтар) уонна сымыыт хаҕыгар баар кальций рассадаҕа туһалаах.
Кыракый иһит булан кыратык буор кутабыт. Помидор сиэмэлэрин марганцовка суурадаһыныгар чаас аҥара илитэбит: 1 ч.нь. сиэмэни ыстакаан аҥара ууга кутабыт. Бу кэннэ, сиэмэбит битэмиин иҥэринэрин туһугар, "Идеал" сурадаһыныгар угабыт. Сиэмэ үрдүгэр сылаас уу кутабыт уонна пленканан сабабыт. Бастакы үүнээйи быктаҕына, пленканы ылабыт уонна сырдык, итиитэ суох сиргэ уурабыт.
Икки сэбирдэх тахсыбытын кэннэ, иһиккэ, эбэтэр сымыыт хаҕыгар көһөрүөххэ наада. Синньигэс силистэри алдьатыа суохтаахпыт. Рассада буорга көстөҕүнэ силистэрэ кэтириэхтээхтэр, оччоҕуна туһалаах веществолары үчүгэйдик иҥэринэр. Үүнээйини аһара улаатыннаран баран көһөрдөххө, кини ыалдьар, өр кэм устата улааппат. Ол иһин, икки сэбирдэх тахсаатын кытта көһөрөр ордук туһалаах. Почва хатыа суохтаах, кислород киирэрин туһугар субу-субу сахсатыллыахтаах.
Рассада олордорго саамай сөптөөх кэминэн кулун тутар ый бүтүүтэ эбэтэр муус устар саҕаланыыта буолар. Помидор күн уотун эккирэтэн ханньары үүммэтин туһугар, чаҕылхай уоттаах лаампаны туттуохха сөп. Уон күҥҥэ биирдэ "Идеал" сурадаһынынан ыстарабыт.
Үүнээйибит улааттаҕына, таһырдьа сылыйдаҕына, тымныыга үөрэтиэххэ наада - аҕыйах чааска күҥҥэ таһааран туруорабыт. Оччоҕуна ыам ыйдааҕы хаһын түстэҕинэ үлүйүөхтэрэ суоҕа. Биллэрин курдук ыам ыйыгар помидору оҕуруокка таһаарабыт. Манна аны иһиппититтэн силиһи алдьаппакка араарыахтаахпыт.
Атыыласпыт рассадан уһун уонна хойуу буоллаҕына, харыстаабакка дириҥ соҕустук көмүөххэ наада. Кирээдэҕэ көспүт кэмигэр төһөнөн элбэх туһалаах веществону иҥэринэр да, соччонон үчүгэй.
Помидор кыра да хаһыҥтан куттанар. Саҥа үүнэн эрэр үүнээйи кыратык даҕаны үлүйдэҕинэ, аҕыйах аһы биэриэҕэ. Онон таһырдьа көһөрөргүн ыксаама - хаһыҥ ааһарын кэтэс эбэтэр анал хаххалыыр материалынан сап.
Орто Дойду #11 Кулун тутар 24 күнэ 2011 с. 8 сирэй