Үүнээйигэ туһалаах эттиктэринэн (кальцийынан, магнийынан, фосфатынан) баай итиэннэ буор састаабын тупсарар буолан, сымыыт хаҕа уоҕурдуу быһыытынан көдьүүстээхтик туһаныллар. Онуоха туох ханнык иннинэ сымыыкка баар белок буорга киирдэҕинэ сытыйан, ыарыы төрүөтэ буоларынан, сымыыты хаҕын үчүгэйдик сууйуллар, куурдуллар.
 

Сиэмэни тылыннарарга. Анал контейнер, фито-таблетка суох кэмигэр оҕурсуу, помидор уо.д.а. үүнээйилэр, сибэккилэр сиэмэлэрин сымыыт хаҕар тылыннараллара. Буор туһалаах эттиктэринэн хааччыллар буолан, арассаада бэккэ үүнэрэ, киэҥ иһиккэ көһөрөргө силиһэ айгыраабат этэ.

Солбуллубат уоҕурдуу. Биэс-алта сымыыт хаҕын бороһуок буолуор диэри мэһийэллэр. Биир лиитэрэ итии ууну кутан, кэмиттэн кэмигэр булкуйа-булкуйа биэс күн устата туруоруллар. Итиэннэ оҕуруот аһын (помидор, баклажан, биэрэс, хортуоппуй) уонна сибэкки арассаадаларыгар куталлар. Маныаха биири өйдүүр наада - сымыыт хаҕар баар эттиктэр бытааннык суурайыллар буоланнар, уоҕурдуу букатын кыра кээмэйинэн кутуллар.

Үчүгэй дренаж. Үлтүрүтүллүбүт сымыыт хаҕа арассада эбэтэр сибэкки иһитин түгэҕэр дренаж оҥорорго барсар.

Үүнээйини харыстыыр. Аһыйбыт, кислоталаах буору чөлүгэр түһэрэргэ 1 кв метр сиргэ икки ыстакаан мэлиллибит сымыыт хаҕын булкуйаллар. Сибэкки арассаадата "хара атах" ыарыыга ылларбатын наадатыгар, үүнээйи умнаһын сымыыт хаҕын бороһуогунан сотуллар.

Олордорго. Мэлиллибит сымыыт хаҕын оҕурсуну, помидору, хортуоппуйу, Болгария биэрэһин, баклажаны олордор лууҥкаҕа куталлар.

Раиса Сибирякова бэлэмнээһтинэ. "Саха ыала" ("Саха сирэ" хаһыат дьиэ кэргэҥҥэ аналлаах сыһыарыыта) Ыам ыйын 12 күнэ