Куукунаҕа олохсуйбут бөрүкүтэ суох сыты сүтэрэргэ хаппаҕа суох, нэлэгэр иһиккэ кыра кээмэйдээх уксуус эбиллибит уутун кутан баран билиитэҕэ оргута түһүллүөхтээх. Аҕыйах мүнүүтэнэн түннүгү аһан хоһу салгылатыллар. Сыт сүтэр.
Долбуурга хаһаанылла ууруллубут ас бородуукталарын аттыгар мас чоҕун илдьиритэн баран, кыра иһиккэ кутан уурар үчүгэй. Оччотугар, тахсыбыт үтүө-мөкү сыты барытын ол бороһуок оборо туруо. Чоҕу сотору-сотору уларытар наада.
Куукунаҕа буһара турар аһын сыта наһаа тарҕамматын туһугар итии билиитэҕэ кымааз тууһу таммалатар албас баар.
Термос иһигэр үөскээбит мөкү сыты уксуустаах уунан сайҕаан сүтэриэххэ сөп.
Тимир хоппоҕо үөскээбит сыты суох оҥороргохоппо иһигэр хас да испиискэни уматыахха наада.
Холодильник сытын суох оҥорорго, пуолка аайы хас да сиргэ хара килиэп тооромоһун уураллар. Суукка курдугунан сыт сүтэр. Оччоҕо килиэби ылан кэбиһиллэр.
Холодильникка лимон хаҕын уурталаатахха, сыт эмиэ сүтэр.
Көстөрүүлэҕэ эбэтэр хобордооххо хаалбыт сыты сүтэрэргэ иһити билиитэҕэ ууран сылыта түһэн баран, түгэҕин иһиллибит чэй быыбаркатын бүрүйэ кутуллар. Ыксары хаппахтаан баран чаас курдук туруораҕын. Ол кэннэ сайҕаан кэбиһиллэр.
Никсик, түүнүк сыттаммыт бытыылкаҕа кураанах кофены кутан баран, хас да чаас туруордахха - сыт сүтэр.
Балык, тууһаммыт хаппыыста эбэтэр чеснок сытын сүтэрэргэ уксуустаах уу көмөлөһүө (2 л. ууга 2 остолобуой ньуоска уксуус). Балык сыта итии туустаах уунан сууйдахха эмиэ сүтэр.
Быһахха иҥмит луук сытын мас арыытынан сотон, сүтэриэххэ сөп.
Татьяна Захарова суруйуута. "Кыым" хаһыат 2007 сыл, олунньу 8 күнэ.