• Мөлтөх уокка ыһаарыламмыт сымыыт күүстээх уокка буспуттааҕар быдан минньигэс буолар.
• Сымыыты ууга буһарарга тэстибэтин наадатыгар мүлтүгүр, уһуктаах өттүн иҥнэнэн дьөлө ас.
• Үүт оргутар миискэн кытыытын  арыынан соттоххуна, үүтүн куотуо суоҕа.

• Килиэп уһуннук сибиэһэй турарын туһугар, аттыгар дьаабылыката, сиикэй хахтаммыт хортуоппуйда эбэтэр тууста уур.
• Мииҥҥэ эбэтэр соуска уоттан ылаат да биир ньуоска ынах арыытын куттаххына, олус минньигэс буолуо уонна бүлүүдэн амтанын тупсаран биэриэ.
• Луугу ыһаарылыан иннинэ бурдукка төкүнүтэн ыл, луугун саһарчы буһуо уонна кэриэриэ суоҕа. Өссө тупсарыаххын баҕардаххына ыһаарылыыр арыыгар кыратык саахарда эбэн биэр.
• Оҕуруот аһын салаакка кутаргар аһыан эрэ иннинэ бысталаа уонна тута лимон согун эбэтэр уксууста кут, кинилэр С битэмиини сүтэриэхтэрэ суоҕа.
• Оҕуруот аһын төһөнөн бөдөҥ гына кырбыыгын да, соччонон кинилэр битэмииннэрин уонна минеральнай туустарын илдьэ хаалаллар.
• сааһыары хортуоппуйга киһи  доруобуйатыгар туһата суох эттиктэр элбииллэр, онон эттээх соҕустук ылан халыҥ соҕустук хаҕылаа.
• Хортуоппуйу түргэнник буһарар туһугар миискэҕэр биир остолобуой ньуоска маргаринна бырах.
• Ууга буһарар хортуоппуйун минньигэс амтаннанарын туһугар ууга сыалай кырбамматах эриэппэ луукта, лавр сэбирдэҕин, 3-4 өлүүскэ чеснок уонна  2-3 укроп сэбирдэҕинэ кут.
• Ыһаарылыыр хортуоппуйун бэйэ бэйэтигэр сыстыбатын наадатыгар, кырбаммыт хортуоппуйгун тымныы ууга крахмала суох буолуор диэри  сайҕаа.
• Хортуоппуйу күүстээх уокка ыһаарылаа, бытаан, мөлтөх уокка кини олус элбэх арыыны оборор уонна харааран хаалар.

"Кыым" хаһыаттан. олунньу 22 күнэ 2007 сыл.