Билигин дьиэ, гараж тутуута, дьиэ иккис этээһэ үксэ каркаас, ол аата аныгы утеплитэлинэн эркиннээн тутуллар буолла.

Кркаас тутуу үлэтэ түргэнинэн, сыаната чэпчэкитинэн барыстаах курдук. Бастаан утаа 5 см халыҥнаах полистроль  15 см халыҥнаах буруус мас сылааһы тутарыгар  тэҥнээх диэн,  дьон оннук туттар этэ. Билигин бэйэм көрүүбэр, лафетынан акылаат оҥорон баран,  ол үрдүгэр полистролунан эркинин сылытан тутар эрэлэ суох эбит, тоҕодиэтэххэ биһиги сирбит кыһын тымныыга үллэн, сайын аллараа түһэн хамныы турар буолан,  полистроль хайыта барыан сөп. Онон каркаас тутууну ыытар буоллахха, ленточнай акылааты түһэриллиэхтээх, ол аата акылааты тимир турбанан, эбэтэр сиэмэнтэн, бетонтан оҥоһуллуохтаах. Онтон полистролу матырыйаал быһыытынан этэр буоллахха, быйыл Дзержинскэй уулуссаҕа гарааж, Строительнай ырыынакка кафе уокка былдьатыыларыттан көрдөххө. Бу туохха да ситтэрбэт түргэн умайыылаах матырыйаал эбит диирбитигэр тиийэбит.

Онон полистроль оннугар минплитаны туттар ордук курдук, ол эрээри кырдьыгын эттэххэ, маннаа сыана араастаһыта улахан, минплита сыаната полистрольтан лаппа үрдүк.

Арай сыаната чэпчэкититтэн күһэллэн полистролунан туттар буоллахха, дьиэ эбэтэр гараж тас өттүгэр, 10 см халыҥнаах полистролу стойкаттан икки өттүгэр биирдии см. тэйиччи гына уган баран күүгэнинэн (пенанан) туох да быыһа суох гына ыстаран кэбиһиэххэ.

Күүгэн-пена туох да аһара үллэр уонна хам сыһыарар састааптаах буолан, полистрольбутун икки стойкаҕа салгын киирбэт уонна хамсаабат гына хам тутан кэбиһэр. Ол кэннэ тутууну уокка  бэриммэтин курдук  умайымтыата суох изоверынан сабыахха.

Изовер инструкциятын быүыытынан ыга баттанар түгэнигэр сылааһы тутар субуойустубата сүтэр эбит, онон кинини сахсархай гына тутан иҥиннэрэллэр уонна  А диэн изоспанынан сабаллар, ол кэнэ 2,5-тээх хаптаһынынан арыттаах гына саайан кэбиһэллэр. Маннык тутуу ис өттө хайаан да гипсокартон буолара наада.

Гипсокартону шпаклевкалаан баран кырааскалаан дуу, обуойдаан дуу кэбистэххэ туох да аһара бэрт көстүүлэнэр. Гипсокартон эмиэ умайымтыата суох матырыйаал, онон "таҥара сэрэҕи таптыыр диэн өс хоһоону  тутуһан, эрдэттэн сэрэхтээх буолары талааччылар, бу матырыйаалга тохтууллара ордук.

"Тиэргэн" Журналтан. 01/2010