Киискэ үөрэтэр быдан уустук, тоҕо диэтэххэ, бу кыыл киэҥ сирдэри туоруур, ыт эккирэтэрин биллэҕинэ саһа барбат, суолун бутуйан, уһуннук ойуолаан, ыт кыайан ааспат эрэйдээх сирдэринэн киирэн-тахсан куота сатыыр. Кииһи бултуургар лайка сыала - соруга - кииһи маска таһаарыы.

Сэттэ ыйыттан күһүн эрдэ, үргүтүллэ илик оҕо тииҥнэр олорон биэрэн түргэнник булларар уонна уһуннук үрдэрэр кэмнэригэр, үөрэтиини саҕалыыллар. Күн бастакы аҥарыгар тииҥ ордук актыыбынай.

Кыылга илдьиэх иннинэ араас хамаанда тылы истэргэ үөрэтиллэр. Ыты үөрэтиигэ кылаабынайа - истигэн буолуутун ситиһии. Күргүйдээн, тэбэн-охсон буолбатах, кытаанахтык ирдииргин биллэрэн туран, эйэҕэстик сыһыаннаһан. Хамаанда тыллара чопчу кылгас, дорҕоонноох буолуохтаахтар.

Уҥуоҕа кытаатарыгар, 6-7 ыйыгар дылы сөпкө аһатыы улахан суолталаах. Бу кэмҥэ иҥэмтиэлээх ас сөптөөх кээмэйин ылбатах лайка намыһах уҥуохтаах, хачаайы буолар. Бултуур дьоҕура мөлтүүр. 

Улаата илигинэ, 2 ыйын иннинэ, ылар ордук, итиэннэ боруода лаайкалартан төрөөбүтү. Оччоҕуна туох үчүгэйдээҕин - куһаҕаннааҕын эрдэттэн билэҕин. Ыт оҕотун төрөппүттэрэ тас көстүүтэ үчүгэйин ааһанүчүгэй бултуур хаачыстыбалаах буолуохтаахтар.