Оччолорго мин биэстээх уол этим. Атырдьах ыйын ортотун эргин эбитэ буолуо, төрөппүттэрим оттуу сылдьаллара. Соҕотоҕун хаалан оонньуу сырыттахпына миэхэ бэйэм саҕа, туох да таҥаһа суох сыбыс-сыгынньах, ып-ыраас, үчүгэй баҕайы уол тиийэн кэллэ уонна: “Ойуурга отон наһаа элбэх, онно бараммыт отоннуох”, – диэтэ.

Бу былаас буолбутун кэннэ мин аҕабын кытта Лүксүгүн муҥхатыгар барса сылдьыбытым. Онно Доосколорго хоно сыттахпытына, Алыһардаах удаҕан кэлбитэ. Кини сирин кырыкыйдар ылбыттарын үҥсэр суруктаах иһэр этэ. Ол хоно сытан биһиги удьуорбутугар Табытыан ойуун босхоҥ өлүүнү хайдах иҥэрбитин туһунан кэпсээбитэ.

Кэрэххэ тутталлар: кугас эбэтэр мыылай маҥан өҥнөөҕү – ынах сүөһүнү, сылгы буоллаҕына – сырайа маҥан, чокуруос харахтааҕы, маҥаас сылгыны. Маны ойуун, дьэ, кыыран, өлөртөрөн, этин сонно биир күн сиэтэн баран, тириитин, баһын уҥуоҕун, тириитин тобуктарынан туйахтарын илдьэ уһулан ылар, боруоста. Дьэ, ол гынан баран икки модьу салаалаах чугас-чугас турар тииккэ маһы үүттүүр уонна икки баһыттан икки салааҕа тайаннарар уонна били үүккэ быанан ыйыыр быһыылаах. Кэрэх сиртэн 6-7 миэтир үрдүктээх буолар. Олох чолойон олорор.

“Тиксии» диэн биһиэхэ муораттан балык үөрдээн, күргүөмүнэн биирдэ анньан кэлиитэ. Нууччалыыта ону “косяк” диэччилэр. Балык үөрэ. Ону биһиги “тиксии” диэн ааттыыбыт. Сайын устата муҥутаан иккитэ кэлэр.