Бары да ытыктыыр, улаханнык убаастыыр кырдьаҕаспыт, биллиилээх топонимист, үлэ сүнньүнэн балачча алтыспыт аҕа табаарыспыт М.С. Иванов-Багдарыын Сүлбэ “Киин куорат” хаһыакка  да, бу “Кыымҥа” да сир-дойду аатын туһунан тиһигин быспакка суруйарыгар, хайаан да кэлэн, көстөн, сэһэргэһэн ааһарыгар, бу санаатахха, үөрэнэн хаалбыт эбиппин. Хайдах эрэ суохтуубун. Михаил Спиридонович, билэргит буолуо, ыарытыйар буолан, уонна сааһырдаҕа даҕаны, дьиэтиттэн тахсыбат. Кини ыччат дьон аахтын, биллин, туһаннын диэн, олоҕун кэрэ-бэлиэ кэмнэрин, топонимикаҕа анаабыта. Уопсайынан, кини суруйууларыгар дириҥ билии сылдьар диир оруннаах. Өссө инньэ сүүрбэ сыллааҕыта “Сахаада”  (05.09.1996) хаһыакка СӨ Култууратын туйгуна Прокопий Флегонтов Багдарыын Сүлбэ туһунан: “Михаил Спиридонович топонимиканан дьарыктанан, 300 тыһ. тахса (!) сир аатын суруйан, картотекаҕа киллэриитэ бу историяҕа умнуллубат кыһыл көмүс кылаат, улахан үлэ муҥутуур чыпчаалын курдук, үйэлэргэ  үөрэтиллэн, ааттанар баараҕай үлэ быһыытынан сыаналаныаҕа”, – диэн дэлэҕэ этиэ дуо! Күндү киһибитин итинник иһирэхтик ахтан туран, мантан аллара “Үс... Сэттэ... Тоҕус” диэн кинигэтиттэн быһа тардыыны билиһиннэриэхпин баҕардым.

Былыр, биһиги оҕо эрдэхпитинэ, кырдьаҕастар эргэ өтөххө хаалбыт малы-салы ончу тыыттарбат, ону ааһан улаханнык саҥарары, тыаһы-ууһу таһаарары сөбүлээбэт этилэр. Айылҕа да бэйэтэ ону ирдиир курдуга.

Бу дьикти түбэлтэ 1948 с. Муома оройуонун Орто Дойду нэҥилиэгэр буолбута.

Сахаҕа сылгы биир сүрүн баай буоларын таҥынан, Орто дойдуга Дьөҥөгөй Айыы бэлэҕинэн ааҕыллар. Быҥата, саха киҥитэ төрүөҕүттэн өлүөр диэри олоҕо барыта сылгыны кытта алтыҥа сылдьар. Ол курдук, былыргы сахаларга киҥи уҥуоҕун тутуу сиэрэ-туома мэлдьи сылгыны кытта ситимнээх буолар. Киҥини тиҥэх суолугар атаарсыбыт, онно кыттыбыт дьону хайаатар даҕаны сылгы этинэн аҥаталлар, сылгы баҥын, тириитин, атахтарын тииккэ ыйыыллар, онтон көмүү ойуун сиэринэн-туомунан ыытыллыбыт буоллаҕына, кэрэх куочайыгар сылгы тириитин иилэ быраҕаллар, төбөтүн анньаллар. Сорох көмүүлэргэ ат баҥын, тириитин иин иҥинээҕи тутууга: холбо, куорчах, тэбиэх үрдүгэр – уураллар