Ойуурга соҕотоҕун сылдьан ыллыа суохтааххын абааһы ыллаһар. "Ким бэрдий" - диэн. Урут кыра сылдьан соҕотоҕун бултуурбар наар чуҥкуйан киҥинэйэн ыллыыр этим. Ону истэн баран ыллаабат буолбутум.

Биир бырааппын кытары күөлтэн - күөлгэ ойуурунан быһа барбыппыт. Арай ойуур иһигэр кып кыракый өтөх баар. Күрүөлээх эҥин, кып кыра. "Туох ааттаах кыра күрүөтэй, манна оттоон да диэн" дии - дии, күлэ - күлэ аастыбыт. Ыллык биир эрэ. Үчүгэйдик билэр сирдэрбит: ханна, ханан бардахха тиийэрбитин эҥин билэбит, барытын быһа сылдьааччыбыт. Былыттаах, күһүн, киэһэрэн эрэр. Күөлгэ тахсан кэллибит. Бастаан билбэтибит: "бай, бу ханна кэллибит, тоҕо түргэнэй! Тоҕо улаханай" - эҥин бөҕөтө. Онтукабыт баара хоннубут күөлбүтүгэр төннөн кэлбиппит. Иккистээн били өтөҕүнэн аастыбыт. Дьиктитэ диэн, ол күөлгэ тахсыбыт сирбититтэн өтөххе диэри уһуннук хаампыппыт, бастаан өтөхтөн күөлгэ эргийэн кэлбит сирбитинээҕэр. Киһи уҥуохтара эҥин бааллар эбит, былыргы гынан баран араҥас буолбатах. Бырааппын кытары үөхсэбин: "Баллаас Сусанин, киһини халтайга хаамтара сылдьаҕын, тэллэйдээбит ынахтар ыллыктарын баппыккын, мин бастыам" - диибин. Киһим өсөһүү бөҕөтө: "Сылдьыбыт сирим, билэбин! Атын ыллыгынан баран хаалбыппыт".

Атын ыллыгы баттыбыт. Харыйа ойуур эҥин кэллэ, хаһан да онно харыйа ойуур суоҕа. Уонна эмиэ били маарыҥҥы сирбитинэн тахсан кэллибит. Эт тарта. Дьаахханныбыт эҥин. Эмиэ өтөҕүнэн аастыбыт. Бу сырыыга саҥата-иҥэтэ суох. Мин бастаатым. Төрүт да атын ойуур курдук, күөрэ-лаҥкы түһэн хаалбыт сиикэлэр эҥин. Эмиэ төннөн күөлбүтүгэр тахсан кэллибит! Борук сорук буолла. Ньоҕойбутугар эмиэ били өтөҕүнэн аастыбыт! Ааһан иһэн бырааппыттан кистээн, киһи уҥуохтарыгар бырастыы гыналларыгар, дьээбэлээбэккэ ыыталларыгар көрдөһөн табах быраҕан аастым. Хата, кимнээҕэр түргэнник тиийэн кэллибит иккис күөлбүтүгэр! Халлааммыт хараҥарыахтааҕар хата төттөрүтүн сырдаабыкка дылы гынна. Куттал бөҕөтө, биир-биэс тыла суох сүр түргэнник хаамтаран аҕылаан-мэҕилээн дэриэбинэбит аартыгын буллубут.

Ykt.ru Автор: Бамброджо