Юкагирдар итэҕэллэринэн орто дойдуга туох барыта - хамныырдыын - хамнаабаттыынараҥаччылыыр иччилээх. Холобур, табаны араҥаччылыыр иччи - Илэн нуннии - түүлээх үөҥҥэ уйаланар.

Бу үөнү соруйан өлөрбүт киһи табата өлөр. Ити курдук харыстыыр бобуулары билэ-билэ кэһии хайаан да иэстэбиллээх буолар диэн санаа иитиллэр.

Хоту биир маннык ынырык үһүйээн баар. Индигиркаҕа юкагирдар халыҥ аймахтара олорбут. Бары күүстээх - уохтаах булчуттар буоланнар, баайдык - тоттук олорбуттар. Быһый уолаттара кыыл табалары дьиэлэригэр үүрэн аҕалаллара. Кинилэр сиппэтэхтэрэ, кыайбатахтара диэн суоҕа. Барыны барытын кыайар - хотор халыҥ аймах, наһаа баран, сиэр-майгы өттүнэн кэхтиигэ киирбит.

Бу аҕа ууһуттан икки орой мэник уол кыыл табалары тутан ылан, баайталаан баран, тыыннаахтыы тыстарын сүлэн ылбыттар итиэннэ оннук ыыталаан кэбиспиттэр. Бу дьулаан быһыыны төһөда туоһута суох оҥордоллор, дьонноро кэлин билэннэр, аҕа ууһун сириттэн кыйдаан кээспиттэр. Ол эрэн бу аймах кыыл табалары араҥаччылыыр иччи кырыыһыттан кыайан куоппатах. Иччи өстүйэн, ыарыыны ыытан, бүтүннүү эстибиттэр. Оттон сэргэстэһэ олорор атын аҕа уустара бу ыарыыга хаптарбатахтар.

Ити курдук итэҕэли тутуспат буолуу, бэйэҕэр эрэ буолбакка, дьоҥҥор-сэргэҕэр бүтүннүүтүгэр кутталлааҕын өйдүөхтээххин.

Г.Н. Курилов, ученай, суруйааччы.

Кыраһа #8 1993 сыл.