Салааты оҥоруу түргэнинэн уонна битэмииннээҕинэн оһуобай.
Салаат аһын хос иһинээҕи температураҕа сойутуллар. Итиини эбэтэр сылааһы куттахха, амтана тосту уларыйыан сөп.
Күөх сэбирдэхтээх эбэтэр сымнаҕас оҕуруот аһыттан оҥоһуллубут салааты туустуу сатаабаттар. Туустан амтана сүтэр, уута тахсар дииллэр. Уопсайынан салааты, амтанын сүтэрбэтин,көстүүтэ уларыйбатын туһугар, остуолга ууруох эрэ иннинэ тууһууллар.
Оҕуруот астаах салааты остуолга ууруох эрэ иннинэ оҥороллор. Оччоҕо иҥэмтиэтэ бэйэтигэр хаалар.
Састаабынан салаат остуолга баар бүлүүдэни хатылыа, эбэтэр олох чыҥха атын буолуо суохтаах. Ол аата борщу кытта хаппыысталаах салааты уурбаккын, оттон үүттээх мииҥҥэ помидордаах салааты биэрбэккин.
Салаат иккис бүлүүдэни кытта бэриллэр буоллаҕына, киһи иһин тотороро соччо наадата суох. Төттөрүтүн, аһыах санааны көтөҕүөхтээх. Онон элбэх күөхтээх буолара ордук.
Салааты үөлбүт эти эбэтэр кэтилиэти кытта тэҥҥэ бэриллэрэ соччо табыгаһа суох. Бу түгэҥҥэ салаат туспа бүлүүдэ буоллаҕына, амтанын, уратытын толору билиэххит. Эти кытта тэҥҥэ бэрилиннэҕинэ ол сүтэр.
Оҕуруот аһын, иҥэмтиэтэ. битэмиинэ сүппэтин туһугар, паарга буһара сатыыллар. Оттон ууга буһарар түгэннэригэр (сүбүөкүлэттэн, күөх горошектан ураты) ууларын кыратык туустууллар, оргуйа турар ууга хахтыы угары сөбүлүүллэр. Ити ас битэмиинин тутан хааларыгар туһалаах дииллэр. Эмалированнай иһиккэ буһарын диэн сүбэлииллэр.
Салаат аһын буһаран, уоттан ылан баран, уутун тута сүөкүүр наада. Итинник гымматахха, уу иҥэн хаалар.
Оҕуруот атын-атын аһын биир иһиккэ буһардахха, өҥүн-дьүһүнүн, амтанын сүтэрэр.
Салаат помидордаах буоллаҕына, уксууһу эбэтэр лимон суогун эбэр табыллыбат - амтана уларыйар.
Петрушканы сылаас уунан сайҕаан ыллахха, сыта-сымара өссө тупсуо.
"Мундирдаах" хортуоппуйу буһаатын кытта тымныы уунан саба куттахха, хаҕа кэбэҕэстик ыраастанар. Буһа турар хортуоппуй хаҕа хайдыбатын туһугар аҕыйах таммах уксууһу эбэллэр.
Хортуоппуй түргэнник буһарыгар анаан, уутугар кыра арыы оҕотун эбэн биэрэллэр. минньийэрин курдук, кыра уокка буһараллар.
Балаһаны бэлэмнээтэ Василина Попова. "Кыым" хаһыат 2009 сыл атырдьах ыйын 6 күнэ.