Мутукчалаах-иннэлээх мас эпиирдээх арыыта олус уустук фитоцидтаах буолан, араас ыарыыны эмтиир. Микробтары суох оҥорон абырыыр.

Маһы араас ыарыы булуон сөп. Элбэх килиэккэлээх паразиттартан саҕалаан тэллэйдэргэ тиийэ, онон барыларыттан көмүскэниэн наада. Дьэ, ол иһин мутукчалаах - иннэлээх үүнээйи сыстыганнаах ыарыыны суох оҥорор, киһи ыарыыга бэриммэт буола күүһүрэр. Оннук күүстээх үүнээйи.

Сүрүннээн, ыылаах харыйа (пихта) сүмэтин, арыытын, бэс үнүгэһин, кедр төбөтүн туһаналлар. Бу үүнээйилэртэн оҥоһуллубут эмп аптекаҕа син баар. Үүнээйи сүмэтин бэйэ да оҥоруохха сөп. Ол курдук, бэс, ыылаах харыйа, харыйа иннэлэрин кыырпалаан баран. биэс улахан ньуосканы 0.7 лиитэрэ ууга кутан мөлтөх уокка 10 мүнүүтэ оргутуллар. Таҥаска суулаан баран биир түүн сойутуллар. Итинник эмп, этиллибитин курдук, араас ыарыыны эмтиир. Холобур, ис-үөс ыарыытын, тымыр склероһун, бүөр таһаарыытын уо.д.а. Н.Н. Петров диэн биллиилээх онколог быраас  50-с сылларга пихтаттан оҥорбут эминэн искэннээх ыарыы улаатарын тохтоппута. Дьоппуоннар кедр эпиирдээх арыытын лейкоз ыарыыга хаан килиэккэтэ чөлүгэр түһэригэр туһаналлар.

Эмтэниэх иннинэ бырааһы кытары сүбэлэһин!

Ангелина Кузьмина. "Кыым" хаһыат. Олунньу 23 күнэ 2012 сыл.