Аһылыкка кииһилэ сэбирдэҕин, умнаһын туһаналлар, онтон эмтэнэргэ - төрдүн, силиһин.

Кииһилэҕэ рутин, С битэмиин, каротин, танидтар элбэхтэр. С битэмиин кииһилэҕэ оҕурсуутааҕар 4, помидордааҕар 3 төгүл элбэх. Аска анаан сэбирдэхтэрин эрдэ хомуйан хатараллар. Бөдөҥ сэбирдэхтэри 3-4 гына бысталаан, оргуйа турар ууга 1-2 мүнүүтэ уган ылаллар. Сэбирдэх кугас өҥнөннөҕүнэ ууттан таһааран сойуталлар.Тоҥорон баран кыһын щи, салаат оҥосторго эбилик гыналлар. Онтон сайын сэбирдэҕин сууйан, бысталаан сибиэһэйдии салаакка, мииҥҥэ эбэллэр эбэтэр минньигэс барыанньа оҥороллор. Ону таһынан, сүөгэй уутугар оҥоһуллубут бутугаска кутан, сайын куйааска утах курдук иһиэххэ сөп.

Күһүн сэбирдэҕэ, умнаһа хатан түспүтүн кэннэ, төрдүн силистэри хостоон ылаат, тута тымныы ууга сууйаллар, салгыҥҥа куурдаллар. Быһаҕынан силиһи устатынан хайыталлар, буорту буолбутун быраҕаллар, онтон салгын охсор сиригэр ууран куурдаллар. Сеп-сеп эргитэллэр. Үчүгэйдик хаппытын кэннэ үлтү сынньан бороһуок оҥороллор. Кэлин оргуйбут ууга суурайан, биитэр испииргэ көөнньөрөн эмп быһыытынан тутталлар..

Кииһилэни оһоҕос ыарыытыгар, хаан барыытыгар, аһаҕас бааска, венерическэй ыарыыларга, сэлликкэ, алкоголизмҥа, кыһыылаах ымынахха тутталлар, оннооҕор хаан үрдүк баттааһынын эмтииллэр.

Чөл буолуу кистэлэҥнэрэ. Халандаар - 2010