"Оҕурсу" диэн тыл грек омук тылыттан  "сииктээх оҕуруот аһа" ди\эн тылбаастанар. Кини 96-9 бырыһыана уу буоларын  быһыытынан, саамай элбэх уулааҕынан биллэр (арбуһу киллэрбэккэ туран). Маны билэр дьон "көнөрү уу буолбатах, өлбөт мэҥэ уута" дииллэр. Бу уу састаабыгар калий, кальций, магний, дьуот, фосфор, натрий, тимир, о.д.а. элеменнэр бааллар. 

Оҕурсу элбэх калийдаах буолан, хаан баттааһыын нуорматыгар түһэрэр. Маны таһынан оҕурсуга В бөлөхтөн С, А, РР битэмииннэр бааллар.

Оҕурсуну медицинэҕэ былыргыттан туһаналлар. Сүрэхтэрэ, бүөрдэрэ, тымырдара ыалдьар дьоҥҥо бу эмтээх ас олус туһалааҕын бэлиэтииллэр. Оҕурсу сүмэһинэ сэллик ыарыытын сымнатар, ньиэрбэни уоскутар, сүһүрүүнү утарсар бэртээхэй  эмп быһыытынан норуокка биллэр. Ол эрээри куртах бааһа, синньигэс оһоҕос төрдө, ноор, колит курдук ыарыылар бэргиир кэмнэригэр оҕурсу сиири тохтоторго сүбэлииллэр.

Оҕурсу элбэх калийдаах буолан, кислотнай холбоһуктары суох оҥорор, оранизмҥа улаханнык туһалыыр. Специалистар быһааралларынан, оҕурсу ас буһарыытын тупсарар, ириҥэрии, сытыйыы процеһын  тохтотор. Сибиэһэй оҕурсуну тиһигин быспакка  сиир киһи щитовиднай быччархай ыарыытыгар ылларбат. Оҕурсуну сүрэх үлэтэ кэһиллиитигэр уонна уойууну утары сииргэ эмиэ сүбэлииллэр.

Оҕурсу суога, бэртээхэй лосьон быһыытынан, тириини көрүүгэ-истиигэ уруккуттан туһаныллар. Бу суогунан күн ахсын соттор киһи өлбөөдүйбүт тириитэ сотору кэминэн сэргэхсийбитин бэлиэтии көрүөҕэ. Оҕурсу хаҕын сирэйгэ уурдахха маҥхатар, ыраастыыр, сымнатар уонна тирии эрдэ мырчыстыытыттан харыстыыр.

И.И. Неустроев. Доруобуйа-дьол. Дьокуускай: Бичик, 2011 с