Былыргыттан билиҥҥээҥҥэ дылы биһиги мииннээһиҥҥэ ынах этин ордук сөбүлээн туттабыт. Ынах этин бытархай гына кырбаан үөрэ оҥостон эбэтэр өлүү-өлүү кырбаһынан буһаран миин бэлэмниибит. Мииҥҥэ сүөһү холун, ойоҕоһун, түөһүн, амынньыарын туһаналлар. Кырбаһынан буһарыыга уҥуоҕу сөп гына тиксиһиннэрэн 250 грамм гына кырбастаныллар.

Ынах этин сэлиэйдээн буһарыыга түөрт порцияҕа анаан уҥуохтаах 1,2 килограмм ынах этин, 75 грамм тууһаммыт күөх луук, 50 грамм бурдук, лавровай лиис, укроп, биэрэс, туус ылыллар. Кырбастаммыт ынах этин тымныы ууга сууйан баран миини буһарар анал көстөрүүнкэҕэ кутуллубут 2 литр ууга эти уган буһарыллар. Оргуйуутун саҕана көбөн тахсыбыт төбүрэх хайаан даҕаны холбуйуллар. Миин оргуйан этэ буһуутун саҕана, сэлиэйгэ анаан мииниттэн баһан кутуллар. Сойбут мииҥҥэ сэлиэй оҥоһуллар, эт үчүгэйдик буспутун кэннэ хоторуллар., сойутуллар, уонна луугу, лавровай лииһи уонна сэлиэйи кутуллар. Миини салгыы оргутан сэлиэйин буһарыллар. Сэлиэйи уһуннук оргуттахха миин убуур. Онон миин оннук убуор дылы оргуйууну ыыппат наадалаах. Хаһаайка миини буһарбыт көстөрүүнкэтиттэн анал фарфоровай миискэҕэ кутан остуолга аҕалыахтаах.

И.И. Тарбахов "Эн остуолун сахалыы астара". Якутскай - 1991.