Сибэккини сорох киһи киэргэл, эмтэнэргэ сөптөөх үүнээйи уонна дьиэ иһинээҕи салгыны тупсарар диэн көрөр. Оттон сорохтор дьайтан, дьаҥтан харыстыыр, ыраастыыр аналлаах дииллэр.

сибэкки киһи сүрэх, тымыр систиэмэтигэр үтүө өттүнэн дьайарын, уйулҕата бигэ буоларыгар көмөлөһөр диэн суруйаллар. Хос иһинээҕи үүнээйи билиҥҥи кэмҥэ киэҥник тарҕаммыт дьиэ-уот техниката таһаарар куһаҕан салгынын ыраастыыр дииллэр. Син биир тыынар тыыннаах буоларынан, төһөнөн таптыыгын, кэпсэтэҕин да, үөрүүгүн үксэтэр, көрөөччүтүн-истээччитин билэн, тылла эбэтэр санньыйа турар. Сибэккини таларга ханнык ыйга-күҥҥэ төрөөбүтүн туһалыан сөп.

Мас курдук көрүҥнээх алоэ үгүстүк ыалдьар дьоҥҥо көмөлөһөр. Буортулаах бактерияттан харыстыыр аналлаах.

Бальзамин үөрүү уонна ис-тас эйгэ дьүөрэлэһиитин, күн энергиятын бэлэхтиир.

Хоруол бегонията кэпсээннээх, ыалдьытымсах ыалга таптаан үүнүө.

Герань кыыһырбыт уоҕу уҕарытар айылгылаах.

Кактус арааһа элбэх. ол эрээри бары биирдик "үлэлииллэр": тастан киирэр мөкү энергияны оборон, ыраастаан таһаараллар. Ол иһин компьютер таһыгар, түннүккэ, киирэр аан утары сөбүлээн уураллар.

Дьоппуон камелията ханна баҕарар салгыны ыраастыыр, дьиэ иһигэр холку, уу нуһараҥ олоҕу сөбүлүүр.

Традесканция туора киһи ымсыы хараҕыттан быыһыыр.

Фикус пылесос курдук үлэлиир. Долгуйуу, хомолто хоммотугар туһалаах.

Фуксия курсуйбут энергияттан харыстыыр, дьиэ иһинээҕи салгын хамсыырыгар көмөлөһөр.

"Кыым" хаһыаттан. Кулун тутар 26 күнэ, 2009 сыл. Василина Попова суруйуута.