Аат диэн киһиэхэ улахан суолталаах.  Саха аатын ыытара, түһэн биэрэрэ, сүтэрэрэ, киртитэрэ улахан аньыынан ааҕыллара. Өбүгэлэрбит киһи төрүөҕүттэн өлүөр диэри үстэ ааттанар диэн этэллэрэ.

Бастакы аат - таптал аат, ийэтэ-аҕата, чугас дьоно биэрэллэр. Иккис ааты оҕо сэттэтин аастаҕына, киһи-хара буолар сибикитэ билиннэҕинэ биэрэллэр. (Былыр оҕо төрөөн баран, өлөрө элбэҕэ бэрт этэ. Ол иһин харыстаан, бу киһи баар, сылдьар диэн аахсыбаттар этэ). Оҕо сэттэтигэр туохха-ханныкка дьоҕурдааҕа сэрэйиллэр буолар. Ол туһаайыытынан, онуоха эбии чугас дьоннорун ыралара кыттыһан, аат толкуйданара. Онтон үһүс ааты туора дьон туох киһи тахсыбытын көрөн, онно дьүөрэлээн иҥэрэллэрэ. сөрү-сөпкө  толкуйдаммыт аат киһиэхэ дабархай курдук сыстан баран, саараама, өлүөр диэри арахсыбат.

Ол курдук, атын омуктарга даҕаны ааты талыы эмиэ улахан суолталаах, быһаарыылаах, олоҕу-дьаһаҕы, дьылҕаны түстүүр дьыала буолар эбит. Холобур, илиҥҥи омуктар киһи аатын дьыл ханнык кэмигэр  төрөөбүтүнэн көрөн биэрэллэр.

Кыһын төрөөбүт оҕо, тымныы-тыйыс майгытын "ириэрээри", сымнаҕас, эйээркэй дорҕоонтон турар ааты биэрэллэр эбит.

Саас төрөөбүт оҕо олус тобуллаҕас өйдөөх буолар эрээри, кытаанах санаата суох диэн, "ырдьыгыныыр" ааты иҥэрэллэр.

Оттон  сайын уонна күһүн төрөөбүт оҕолорго улаханнык дорҕооннору сыымайдаабакка, ааты судургу гына толкуйдууллара үһү. сайыҥҥы оҕолор айылҕаттан дьоһуннаах, хорсун, сыаллаах-соруктаах, түргэн-тарҕан, сыыдам майгылаах буола төрүүллэр дииллэр эбит. Күһүҥҥү оҕолор олоҕу хайдах баарынан ылыналлар. Усках тылы итэҕэйбэттэр. Истибиттээҕэр көрбүттэрин ордороллор. Тэһиркэй өйдөөхтөр, киэҥ көҕүстээхтэр, кичэмнэр, хаһаастаахтар.

"Кыым" хаһыаттан.Балаҕан ыйын 9 күнэ, 2010 сыл. автора суруллубатах.