Күннээҕи олоххо көстөр, киһиэхэ барытыгар биллэр өрүттэри наука көмөтүнэн бигэргэтэн дакаастыыллара баар суол. Ол курдук, Великобритания учуонайдара 60 сыл устата кэтээн-үөрэтэн көрөн баран, ийэтин эмиийин эмпит оҕо олоҕор ордук ситиһиилээх буоларын уонна социальнай кирилиэһинэн быдан түргэнник дабайарын дакаастаабыттар.
Бристоль университетын үлэһиттэрэ бу алта уон сыл устата II Аан дойду сэриитин иннигэр эрэ аҕай төрөөбүт 1400 киһини кэтээн көрбүттэр.. Ийэ үүтүн солбуйар атын аһы аһаан улааппыт дьоннооҕор, эмиийдээхтэр социальнай балаһыанньаларын 41%-нан ордук тупсарбыттар. Оттон киһи төһө түргэнник сайдара ийэтин төһө өр эмпититтэн быһаччы тутулуктаах эбит. Өскөтүн дьиэ кэргэнтэн биир эрэ оҕо ийэтин эмпит эбит буоллаҕына, кини кыаҕа,бииргэ төрөөбүттэригэр холоотоххо, 16 быраһыанынан үрдүк буолар.
Күн бүгүн сайдыылаах дойдуларга кыһыл оҕолорго анаан оҥоһуллубут утахтары орто дохуоттаах ыал ордук туһанар эбит буоллаҕына, ааспыт үйэ 30-с сылларыгар уопсастыба бары араҥатыгар тэҥҥэ тарҕана сылдьыбыт. Ол саҕа ордук үптээх-баайдаах дьон хото атыылаһаллара үһү.
Сүрүн чинчийээччи Ричард Мартин ийэ үүтүн туһата биологическай да, психологическай да төрүттээҕин бэлиэтиир. Ийэ үүтүн иһэн улааппыт оҕо ордук чэгиэн эттээх-хааннаах уонна сытыы өйдөөх буоларын бу кэтээн көрүү дакаастаабыт. Оттон ийэ уонна оҕо эмоциональнай алтыһыылара, биллэн турар, оҕо салгыы сайдарыгар туһалааҕа саарбаҕа суох.
"Кыым" хаһыаттан. Олунньу 22 күнэ, 2007 сыл.