Оҕо доҕордоһо үөрэнэригэр көмөлөһөн маннык ньымалары туттуохха сөп:

1. Оҕоттон детсадка барыар диэри (4 сааһыгар) доҕордрһуу суолтатын өйдүүрүн эрэйимэн. Үгэс курдук, оҕо күн сирин көрүөҕүттэн сыыйа-баайа, улаатан истэҕин аайы дьон-сэргэ эйгэтигэр киирэн, төрөппүттэрин, чугас дьонун кытта хардарыта сыһыаныттан бэйэтэ да билбэтинэн кэнэҕэһин дьон ортотугар бэйэтин салайынар, тутта-хапта сылдьар олугун уурунан иһэр. Онон кыра оҕону,  улахан дьону уонна оҕолору кытта көрсөрүн, кэпсэтэрин, оонньуурун биһирээн, уопсастыбаннай миэстэлэргэ сырытыннара үөрэтин.
2. Биһиги төрөппүттэр, тус олохпутугар да, кэлэктиипкэ да хайдах сыһыаны олохтуурбут эмиэ оҕолорбутугар сабыдыаллыыр. Бэйэбит аҕыйах табаарыстаах, дьону аанньа ахтыбат буоллахпытына, оҕолорбут эмиэ тоҥуй, эйэҕэһэ суох буола улаатыахтарын сөп.
3. Үксүгэр төрөппүт оҕото кэлэктиипкэ киирэригэр үөскээбит ыарахаттары бэйэтэ туоратар кыахтаах. Биэстээх-алталаах уол оҕо сатаан мээчиктээбэккэ, атын оҕолортон сэнэбили көрсөр буоллаҕына, аҕата кинини иллэҥ кэмигэр эрчийэн, футбол оонньуурга үөрэттэҕинэ киниэхэ табаарыстарын сыһыанабиллэрдик тупсуо.
4. Төһөнөн биһиги оҕобутун кытта сыһыаммытын тупсара сатыыбыт да, соччонон кини табаарыстарын кытта сыһыана сылаас буолуо. Өскөтүн оҕоҕутун наар дьарыйар, мөҕөр-этэр буоллаххытына, кини бэйэтин хомолтотун, кыйаханыытын атын оҕолорго тоҕо тэбиир буолуон сөп. Оннук этиһиик, кинээх оҕону, биллэн турар, оҕолор кэлэктииптэрэ сөбүлээбэт. Уонна төттөрүтүн оҕону төрөппүт сиэри таһынан маанылыыр, атаахтатар, үрүҥ чыычааҕы үрдүнэн көтүппэт буоллаҕына, бу оҕо биир саастыылаахтарын кытта сатаан эн-мин дэспэт, кыраттан сылтаан хараҕын уутунан сууна сылдьар буолар. Аны оҕо дьиэ кэргэн эргийэр киинэ, күнэ-ыйа курдук сананар буоллаҕына, детсадка, оскуолаҕа оҕолор кинини таҥара курдук көрбөттөрүттэн эмиэ ньиэрбинэйдиэн сөп.

Саха ыалын халандаара - 2012