Былыр биир күүстээҕинэн биллэр киhи айаннаан иhэн ыалга хонор. Ыаллара саастаах соҕус курдуктар да биир эрэ кып кыра оҕолоохтор үһү(былыр ыал 10-ча оҕону төрөтөр, онтон аҕыйах тыыннаах хаалар). Ону туоhуласпытын оҕолоро бары кыраларыгар өлөн иhэллэр эбит. 

Ону кинилэр да дьиэлэрин ыраастата эҥин сатаабыттар быhыылаах, оҕолорун от-мас кыыл-сүөл аатынан ааттыы сатаабыттар да туhа суох үһү. Киэhэ аhылык кэннэ утуйбуттар. Арай түүн оҕо ытыырыттан уhуктан кэлбит. Ийэтэ турбакка эрэ илиитинэн оҕо биhигин хамсатан баран салгыы утуйар үһү. Өр өтөр буолбакка оҕо эмиэ ытыыр үһү. Ону эмиэ ийэтэ биhиги эрэ хамсатан баран утуйар. Онно ыалдьыт тулуйбакка өҥөйөн көрөр. Балаҕан иhэ уу чуумпу, арай көмһлһөк оhох сырдатарыгар көрбүтэ чачархай туох эрэ биhик аттыгар хамсыыр аҕай эбит. Ону биhи киһибит үөмэн тиийэн өйдөөн көөртө кыра 5-6 саастаах оҕо курдук сыгынньах киhи турар. Баттаҕа чачархай эбит. Онтукабыт оҕо биhигин өҥөйөн баран  туох эрэ кылабачыгас быыл курдугунан үрэр эбит, ол онно утуйа сытар оҕо ытаан барар эбит, онуоха биирэ күлэр аҕай үһү. Ыалдьыт ону көрөн баран үөмэн тиийэн ол чачархай баттаҕыттан хаба тардан ылбыт. Онуоха биирдэстэрэ атахха биллэрбит. Ыалдьыты соhон истэҕинэ балаҕаны ортотунан туруору өйөөн турар мастан тутуhан нэhиилэ тохтоппут. Ону ол абааhылара кыратык ынчыктыы, кылана түhэн баран ынырык улаханнык часкыйбыт уонна иннин диэки ыстанан кэбиспит да куоппут. Арай ыалдьыт нэhиилэ тутуhан хаалбыт. Аҥар илиитигэр баттаҕын эрэ бобо тутан хаалбыт. Ол түбэлтэ кэннэ ити ыалга оҕолоро өлбөт буолбуттар үһү. Ити абааhыны чөчүөккэ буолуо диэн сабаҕалаабыттар

Http://vk.com сайттан Василий Васильев суруйуута.