Аһаҕас эттээх дьон мээнэ киһи көрбөтүн көрөр, билбэтин билэр, айылҕаттан анаммыт ураты оҥоһуулаахтарын бары да бэркэ диэн билэргит буоло. Ол курдук биир эдэр соҕус уол баара, кини кыра эрдэҕиттэн дьонтон уратытын сэрэйэр эбит, элбэх дьиктини-дьээбэни көрбүт-истибит киһи. Ол курдук биир дьикти түбэлтэ тайҕаҕа буолбут... 

күһүн үс болан бултуу тахсыбыттар, абаҕата уонна сааһырбыт оҕонньор баар эбит. Биир үтүө киэһэ, уол утуйардыы оҥостон, чүмэчи уотугар нухарыйа-нухарыйа, ааспыт нэдиэлэтээҕи эргэ хаһыаты хат ааҕа сыппыт. Абаҕата "илим көрө бардым" диэн таһырдьа дьүккүйбүтэ номнуо икки күөс быстыҥа буола охсубут...(тугун хойутай?) оҕонньор буоллаҕына кырдьаҕас киһи сиэринэн сылаас сиргэ-оһох кэннигэр оҥостон утуйбута балай да буолбут, муннун эрэ тыаһа иһиллэрэ эбитэ үһү... Уол, төлөнө бүтэ илик кураанах мас, умайан сыыгыныыр тыаһын истэ-истэ саҥа нухарыйан истэҕинэ үүтээн аана аһылла биэрбит даҕаны, тыбыс-тымныы салгын чүмэчини уотун саба үрэн кэбиспит, үүтэн иһэ соҕотохто өлбүт киһи иининии ытыс таһыйар хараҥа буола түспүт ... Уол утуйар уута, умуллубут чүмэчи уотунуу симэлийбит, куйахата күүрбүт, сиһин этэ тымныы уунан ыспыт кэриэтэ хам ылан кэбиспит. Сытан эрэ оргууй көрө сатаабыт да, күһүҥҥү халлаан барахан ыас-хараҥанан тобулу көрөн турбут, арай ол быыһыгар киһиттэн да, кыылтан да ураты ыар ынчык иһиллибит, киһи мунна тулуйбат амырыын сыта саба биэрбит... Оһох сандаарар уотугар арай кыһыл харахтаах, аһыылаах тиистээх кыра баҕайы бээгэй эмээхсин көстүбүт, көрбүтүнэн оҕонньор сытар сирин диэки атаҕын соһо-соһо сыыллан барбыт... Уол эрэйдээх оччолооҕу көрөн тыынар да кыаҕа суох, утуйбута буола-буола испиискэ умата сатаабыт да, сараһын баарына, уота туох да иһин умайбатах. Хата сыыһа хамнанан тыас тааьаарбыта, эмээхсинэ аны кини диэки сирэйдэммит, "тоойуом! хата билигин эйиэхэ тиийиэм!" диэбитинэн сүрдээх үлүгэрдик кини диэки дьуккуйбут. Уол сарылыы түһээт атахха биллэрбит, аһаҕас аан нөҥүө таһырдьаны былдьаспыт. Ойон тахсыбыта абаҕата бу хааман иһэр эбит, уол ыһа тоҕо туох буолбутун сэһэргээбит, киирэн көрөргө быьаарыммыттар. Иһирдьэ көтөн түспүттэрэ эмээхиннэрэ хайыы үөдэн ырааһыра охсон хаалбыт... Тиийэр тиһэҕэр баттаппытын буолуо диэн быһаарбыттар. Кырдьаҕас ити түбэлтэ кэнниттэн күн сиригэр уһаабатах... Дьэ итини да эһэлэрбит этэн эрдэхтэрэ: "Өйдөөн!!! Куһа5ан тыын, үчүгэйгэ көстүбэт!!!"

Http://vk.com сайттан Владислав Собакин суруйуута.