Бу түбэлтэҕэ бэйэм илэ түбэспитим,6 кылааска үөрэнэр кэммэр. Сайын этэ, сайылыкка эбээбэр көмөлөһө сыдьыбытым. Биэс чааска ынах хомуйа баарбытым.  Ынахтарбын Туора диэн ааттаах алаастан буламмын тэбиэлии охсуолуу туруортуу сыдьан эмискэ хантан да кэлбиттэрэ биллибэт алаас арҕаа өтгүтэр сыыр үрдүгэр үс аттаах киһини көрдүм.

Арай көрдөхпүнэ миигин көрөн турар курдуктар, ону мин эһээм дии санааммын кинилэр диэки сүүрдүм. Сыыры дабайан тахсан истэҕим аайытын ынырык куһаҕан сытыйбыт сыт кэлэр этэ. иннилэригэр киирэн биэрэн баран биирдэ өйдөөн көрбүтүм били аттаах дьонум төрүт сирэйэ-хараҕа, айаҕа суохтар эбит, барыта эт. Кыланардыы часкыйан баран уолуйан хаалан төттөрү аллараа сүүрэн түстүм. Түһэн иһэн умса баран түспүтүм, кэннибин хайыһан көрбүтүм мин диэки иһэллэр эбит. Паникалаан кыайан хамсаабат буолан сыттахпына ынах иннибэр сүүрэн кэлэн турунан кэбиспитэ, аттаахтар ол ынахха киирэн сүтэн хаалбыттара. Алааска уолуйан баран олорорбун эбээм кэлэн сайылыкка илдьибит этэ. Ол кэннэ мин сайыны быһа ыалдьыбытым, түүн утуйбат буолан хаалтым. Төбөбүнэн бырахтара сыһан баран Уус-Алдаҥҥа ханнык эрэ отоһукка сылдьан утуйар эҥин буолбутум. Ол ынаҕым оно миэстэтигэр  өлө сытар үһү. Эбээм эппитэ: "Абааһы диэн итинник эбит, куһаҕаҥҥа эрэ кэлэр". Ол отоһут миигин ол ынах быыһаабыт диэбитэ, ынах суоҕа эбитэ буоллар мин өлбүт буолуом этэ.

Http://vk.com сайттан. Николай Степанов суруйуута.