Бу түбэлтэни табаарыһым кэпсээн турардаах. 4 - 5 сыллааҕыта күһүн иккиэ буолан мотоциклынан кустуу барбыттар. Биһиги дэриэбинэбитигэр "Куталаах" диэн урукку быраҕыллыбыт сайылык баар, онно кус ийэтэ аҕата наар туһэр улахан уулаах.

Дьэ настроение бөҕөтө буолан айдааран - куйдааран тиийбиттэр. Табаарыһым саҥалаах баҕайы, айаҕа сабыллыбат.  Түүнү быһа айдааран, араас көрдөөх түгэннэри  кэпсэтэ - кэпсэтэ күлбүттэр, айдаарбыттар ахан. арай ол олордохторуна ыраах соҕус бүүчээн дуу, эһэ дуу хаһыытын курдук туох эрэ хаһыыта иһиллибит. "Ээ, бүүчээн сылдьар быһылаах" диэн аахайбатахтар, онтон иккистээн хаһытаабыт, үһүстээн... Хаһыыта чугаһаатар чугаһаан иһэр үһү, улам тугу эрэ сиппит - хоппут, тугу эрэ кыайбыт курдук хаһыытаан барбыт. Уолаттар соһуйбуттар ахан, саҥалара кыччаан хаалбыт, иһиллээн баран олорбуттар. Арай ол олордохторуна күөл нөҥүө өттүгэр күлүк көстүбүт уонна ууну туораан барбыт. Олох ууну таарыйбакка үрдүнэн устар үһү. Куп куһаҕан амырыын сыт кэлбит, табаарыстарым уолуйан хаалбыттар, "саҥара сатыыбын, саҥам даже тахсыбат буолбута" диэн кэлин кэпсээбитэ. Ол олорон эмискэ ууга умса баран түспүт уонна табаарыһын илиититтэн соһон матасыыкылларын диэкки сүүрбүттэр. Били күтүр олох хаһыыта ынырык , киһи этэ тардар хаһыыта үһү, чугаһаатар чугаһаан испит. Мотоцикллара буоллаҕына хаста сүүстэ үктэнэн, "аһаттахха" хайаатахха собуоттанар этэ, онтукаларын биирдэ үктээн кэбисбиттэр уонна дэриэбинэ диэки газтаан түһүнэ турбуттар. Ол бииргэ кустаабыт уола былырыын сайын суох буолбута. Сити түбэлтэни кытта сибээстээҕэ дуу, суоҕа дуу, ким билэр... 

Http://vk.com сайттан. Виктор Семенов суруйуута.