Икки сыллааҕыта таҥха кэмигэр бүлүүһэ сүүрдүүтүнэн  ыалдьа сылдьыппыт. Саатар бырабыланы эҥин соччо билбэппит, бокуонньук эбээм дьиэтигэр (онно ким да олорбот) сүүрдэр буоллубут, син билэр киһилэрин миигин ыҥырааччы буол диэн олортулар. 

Син элбэх бокуонньугу  ыҥырдыбыт да ким да кэлбэт, кэлбэтэхтэринэ бэйэбит соһоммут эҥин быраһаайдаһабыт. Сүүрдэ сатаан баран бырахтыбыт. Түүн дьиэбэр кэлэн утуйдум. Сарсыҥҥытыгар түүн үөһүгэр утуйа сыттахпын хоһум иһигэр атах тыаһа бөҕө, истиэнэннэн эҥин хаамаллар, дьиэ үрдүнэн эҥин, мин суорҕаным иһигэр киирэн буһуу - хатыы бөҕө. Ыксааммын светильник холбоотум, атах тыаһа тохтоото, "фуу" диэн өрө тыынным, оннук сытан, уум быыһынан көрдөхпүнэ хоһум аана аргыый аҕайдык аһыллан ылла, олох дөйөн хаалан баран сыттым, тыымаппын даҕаны, туох да киирбит сибикитэ көстүбэт, саатар быраатым куоракка саҥа дьыллыы хаалбыт.
 Мин утары кини ороно турар, арай кини оронун көрө сыттахпына орон анныттан  түү буолан хаалбыт алта атахтаах туох эрэ тахсан баран истиэнэ,  дьиэ үрдүн устун сүүрэн баран түргэн баҕайытык хоспуттан тахсан хаалла, олох кутталбыттан хаһытаабыппын бэйэм да өйдөөбеөккө хааллым! Ийэлээх аҕам сүүрэн кэллилэр, "туох буоллун" эҥин бөҕөтө, уоскуйан эҥин баран туох баарынан кэпсээн биэрдим. Ийэм оһоҕу  аһатта, аҕам: "Сарсын баран ыҥыртаабыт дьонноргун үчүгэйдик ыҥыран  баран быраһаайдаһаар"  - диэтэ, оннук сарсыныгар национальнай культура учууталын ыҥыран бүлүүһэ сүүртүбүт, киһи кыһыйыах ыҥыртаабыт дьоннорум бары кэллилэр, миигин мөҕүү - үөҕүү бөҕөтө: "Сатаан да ыҥырбат буолан бараҥҥын тоҕо ыҥыраҕын"   - эҥин дииллэр, "Хайа, куттаннын дуу бөөлүүн" - боппуруос бөҕө!  Ол кэннэ аны хаһан да бүлүүһэ эҥин сүүрдүөм суоҕа!

vk.com сайттан. Владимир Иванов суруйуута.