Биирдэ күһүөрү сайын ынахпыт кэлбэтэҕэ 3 күн буолбутугар ынахпытын сүтэрэн чугас алаастарынан, сыһыыларынан сатыы көрдүү бардым. Күнү быһа көрдөөн ынахпын булбатым.

Киэһэ 5 чаас буолан эрэр. Ол сылдьан сааһыра барбыт Матвейы көрүстүм. Мин ынахпын көрдүү сылдьарбын истэн Матвей бэҕэһээ мантан тэйиччи сиргэ эриэн ынах соҕотоҕун сылдьарын көрбүтүн кэпсээтэ. Арааһа биһиги ынахпыт сылдьыбыт быһыылаах, биһиги ынахпыт эмиэ эриэн. Ол сири хайаан да көрөргө сананным. Туох буолан дьиэтигэр кэлбэккэ ити сиргэ сылдьара буоллар диэн саныыбын хааман иһэн. Син өр хааман били алааспар кэллим. Арай көрбүтүм биһиги ынахпыт эргэ өтөх аттыгар маҕырыы турар эбит. Ынахпын ыҥыран көрдүм, мин саҥабар олох да кыһаммат. Чугаһаан тиийэн көрбүппэр өтөхсүйбүт балаҕан баар эбит, эргэ балаҕан да буоллар сууллубакка турар эбит. Чугаһаан кэлбиппэр ынаҕым балаҕан диэки көрөн туран маҕыраа да маҕыраа буолар, миэхэ олох кыһаллыбат. Ынаҕым сирэйэ - хараҕа турбут аҕай көрүҥнээх. Туох буолан өтөхсүйбүт балаҕаны булла диэн балаҕан түннүгүн өҥөйөн көрбүппэр арай саҥа төрөөбүт ньиирэй сиргэ сытар эбит. Мин ол ньиирэйи көрөн дьиктиргээтим аҕай, биһиги ынахпыт быйыл саас төрөөбүтэ, манна ньирэйи ким аҕалан хаалларан барда диэн. Ынахпын дьиэтигэр үүрэ сатыырбын олох барбат, ньирэйтэн барыаҕын баҕарбат. Ньиирэйи көтөҕөн илдьиэм диэтэххэ айыкката да бэрт, уонна ити биһиги ньирэйбит буолбатах. Чаас ыраатан эрэр эбит, өр толкуйдуу барбакка дьиэлииргэ сананным. Дьиэбэр тиийэн ынахпытын ханнык алааска көрбүппүн, ньирэй эҥин туһунан кэпсээн биэрдим. Аҕам ону сарсын сарсыарда ол алааска барыахпыт диэтэ. Сарсыныгар аҕабын кытары тиийэн көрбүппүтүгэр ынахпыт өтөх аттыгар тиэрэ түһэн өлө сытар эбит, ньиирэй ханна да суох.

Ykt.ru. Автор: Кэпсэньит