Уоһааны удаҕаҥҥа сыһыаннааҕы биири кэпсиэхпин баҕарабын. Аан бастаан бу удаҕан уҥуоҕар уолум 4 саастааҕар алҕас түбэспиппит.
Түбэспит даҕаны түгэммит олус дьикти этэ. Отон көрдөөн билисибиэккэ мэҥиэстэн, уолбун олордон айаннаабытым. Оҕобун өрүү доҕор оҥостон илдьэ сылдьарым. арай Табаҕа арахсыытыгар тиийбэккэ эрэ... Ат хаайбытынан Чааппаҥа сиһин диэки түспүппүт. Ол баран иһэн эмискэ баҕайы үрүмэччи бөҕөтө суолга түһэн олорорун ортотунан киирэн ааспыппыт. Кытархай үрүмэччи үөмэх буолан өрө көтөн, биһигини атаарар курдук тулабытыгар өрө көппүтэ. Уолум олох үөрэн өрө часкыйа түспүтэ: "Ийээ, биһиги остуоруйаҕа кэллибит дуо?" - диэбитэ. Онтон, оргууй, сымыйа курдук, икки курупааскы суолу туораабыта. Оҕом өссө үөрбүтэ. Мин даҕаны соһуйбутум аҕай. Онтон биир сиргэ куобах оҕолоро оонньоколоһо сылдьаллара. Оҕом: "Дьиҥнээх остуоруйа дии!" - диэн наһаа үөрбүтэ. Биһиги тохтоон, куобах оҕолорун чугастан көрөөрү үөмэн киирбиппит. Куобахтарбыт оҕолоро чохчоҥноһо ойо турбуттара. Ол тахсан иһэн эмискэ хойуу баҕайы, кыра остуол курдук улахан отоҥҥо кэтиллэ түспүппүт. Уолум үөрүүтүттэн өрө чачыгырыы сылдьыбыта. Түргэн баҕайытык иһиппитин толорбуппут. иһиппит даҕаны 7 лиитирэлээх канистра этэ. Оннук хомуйса сырыттахпытына уолум эмискэ:
- Ийээ, көр эрэ. Ол маһынан оҥоһуллубут көтөр турар, - диэбитэ.
Үөһээ диэки көрө түспүппүүт!!! Турар эбит ээ!!! Икки төбөлөөх, кутуруктаах ойуун куоһаҕа. Сүрэҕим хайдах эрэ мөҕүл гынан ылла уонна салла санаатым. Оргууй уолбун сиэтэн ырааһыйа диэки хаамыах буолбутум, туох эрэ мас өрө ыһыллан сытар эбит. Өйдөөн көрбүтүм араҥас сууллан түһэн сытар эбит. Хайыахпыный... Чугаһаан көрдүм. Көрбүтүм... хаһыы хоруоп аһаҕас сытар этэ. Үөһээ өттө өссө маска ыйанан турара, атах өттө сиргэ сытара. Ол атах өттүгэр баһыне уҥуоҕа сытара... Оргууй, уолум көрбөтүн диэн муоҕунан дуу, көмнөҕүнэн дуу сабан кэбиспитим уонна уолбун сиэтэн эргийэ хааман баран кэннибинэн тыаҕа киириэхпэр диэри тэйбитим... Тоҕо оннук гыммыппын бэйэм даҕаны билбэппин. Харыстана санаабытым буолуо... Онтон махтанан тоҥхоҥноон баран дьиэбитигэр төннүбүппүт.
А.Гаврильева. "Туймаада уоттара" хаһыат. 19.01.2012 сыл.