Мин биирдэ улаханнык ыалдьан тыа балыыһатыгар эмтэнэ сыттым. Палатаҕа түөрт буолан сытабыт.

Биир кырдьаҕас эмээхсин баар этэ,  киэһээ аайы мунна тыаһаан  сүгүн утуппат буолааччы. Дьэ, утуйа сыттыбыт. Түүн ортотун саҕана мурун тыаһыттан уһуктан кэллим. Палаата иһэ хабыс хараҥа. Ол сытан хараҕым хараҥаҕа үөрэннэ, ону-маны боруҥуйдан көрөр буоллум. Арай көрдөхпүнэ ким эрэ миэхэ иһэр!.. Чугаһаан кэллэ уонна ырдьайа-ырдьайа моонньубар түһэ сатыыр. Мин хабарҕабын туттарымаары хаһыытыы, мөхсө сатыыбын. Киһи кыһыйыах саҥам олох тахсыбат. Ол да буоллар бэриммэппин, мөхсө сытабын. Онтон били баҕайы эргиллэ биэрдэ да, муннук диэки сытар чүөчэҕэ барда. Онно өйдөөн көрбүтүм уһун маҥан ырбаахылаах уонна санныгар дылы баттахтаах эбит. Сотору буолан баран анарааҥҥы чүөчэм ынчык бөҕө буолла. Мин куттанан суорҕаммын бүрүнэн кэбистим.

Сарсыарда турбуппут били чүөчэм сирэйэ-хараҕа мөлтөх. мин киниэхэ чугаһаан кэлэн бөөлүүҥҥү түбэлтэни кэпсээтим, "эн диэки барбыта" диэни көтүтэн туран. Онуоха чүөчэм соһуйда аҕай, оруобуна били дьахтары ойуулаата. Ол аата мин түһээбэтэх эбиппин...

Ол чүөчэ дойдутугар баран өлбүт сурахтааҕа. Мунна тыаһыыр эмээхсин баар, билигин сааһа аҕыс уона. Мин этэҥҥэ сылдьабын. Бу диэн санаатахха, ол чүөчэҕэ барыахтааҕын буккуйан, миэхэ кэлэ сылдьыбыт эбит дии санаатым. Билигин биирдэ эмит ыарыйдахпына палаатаҕа соҕотоҕун отой сыппаппын. Иккиһин хатыланыа диэн куттанабын..

Мила. "Туймаада уоттара" хаһыат.. Ахсынньы 15 күнэ, 2011 сыл.