Мин оҕо эрдэхпиттэн айылҕа дьиктитин интириэһиргиибин. Абааһыны, чөчүөккэни илэ көрбөтөҕүм гынан баран, аҕыйахтык да буоллар айылҕа дьиктитин көрөн турабын.

... Оҕо сылдьан күөл уҥуоругар дьон уҥуоҕа баарын көрөрүм. Син тэйиччи, балтараа биэрэстэ ыраах буолуохтара.

Биирдэ кыһын, ыраас баҕайы чаҕылхай күн, күөл уҥуорун одуулааччы буоллум. Таһырдьа мас кыстыы сырыттым быһыылааҕа. Арай, били дьон уҥуохтара хайдах эрэ улаатан хаалбыттар. Көрдөхпүнэ өссө хайдах эрэ салгын дьиримниир курдук. Бастаан утаа аахайбатым.

Сотору соҕус иккистээн ол дьон уҥуохтарын диэки көрдүм. Оо, дьэ эбитээ, доҕоор!..

Дьон уҥуохтара буолуохтара баара дуо, үллэн-баллан, багдаллан уп-улахан дьиэлэр күөл уҥуорун сабардаан тураллар эбит ээ. Эчи, улахан да дьиэлэр! Өйдөөн көрбүтүм эмиэ да дьон уҥуоҕун курдуктар. Кырдьык дьон уҥуохтара эбит. Били дьиҥэр кыра, дьоҕус соҕус дьиэ курдук тутар өлбүт дьон пааматынньыктара улаатан, чуп-чуолкайдык көстөллөр. Мэктиэтигэр, хас биирдии маһын быыһа көстөр, оҥойбут түннүктэрэ бу ынырыгын...

Мин куттанан дьиэҕэ киирэн хааллым. Сотору соҕус буолан баран тахсан көрбүтүм, туох да көстүбэт буолбут этэ. Айылҕаҕа итинник дьулаан көстүүнү уонна көрө иликпин. Аҕабар эппиппэр: "Ол дьэргэлгэн буолуо", диэбитэ.

Иккис түбэлтэ эмиэ киһи уҥуоҕун кытта сыһыаннаах. Биирдэ кустуу баран-баран, хойуутаан хааллым. Бөһүөлэккэ төннөрбөр хабыыс хараҥа буолла. Аара киһи уҥуохтара бааллар, ону ааһыахтаахпын. Арай, ыраахтан көрбүтүм өлбүт дьон уҥуоҕа сырдык уотунан сандааран олорор... Мин куттана санаатым. Саалаахпын, бэлэм туппутунан сэрэнэн чугаһаан истим. Чугаһаатаҕым ахсын уот сырдыга мөлтөөн истэ. Аттынан ааһарбар туох да көстүбэт буолбут этэ. Улахан уол буолан наһаа оҕо курдук куттамматаҕым. сэрэхэдийдэрбин да, "дьэ, хата, чугастан көрүөм" дии санаабытым. Онтум туолбатаҕа. Билигин ону санаан, хата дьэ куттаныах курдукпун. Туох эбитэ буолла?

АЙСАН. Туймаада уоттара. Ахсынньы 15 күнэ. 2011 сыл.