Ити араас Айыылар тустарынан сэһэннэри санаан кэллим. Мин биир дьикти түгэҥҥэ түбэһэн турабын...
Аммаҕа гастролга сылдьабыт. Саҥа дьыл каникулун кэмигэр этэ быһыылааҕа. Сааскы каникул эбитэ буоллар бүлүүһэ сүүрдүө суох этибит. Амма гостиницатыгар олорон эрэ киэһээ бүлүүһэ сүүрдээччи буоллубут. Кими ыҥырабыт диэн буолбутугар ким эрэ:
- Алтан Айыытын ыҥырын! - диэн этии киллэрдэ.
Хап-сабар ыҥырааччылар буоллубут. Бүлүүһэбит оргууй сыыллан киирэн барда. Ким эрэ: "Анньа сылдьаҕыт..." - диир. Ким эрэ итэҕэйэр. Оргууй кэлэн төгүрүк иһигэр турбутун кэннэ боппуруоста биэриҥ диэн буолла. Бары даҕаны толло быһыытыйан, тугу да саҥарбакка олордубут. Онтон биир оҕо тарбаҕын ууран олорон:
- Сарсын дьиэбитигэр тиийэбит дуо? - диэн чап гыннарда. Бары ыһыытаһа түстүбүт. Бүлүүһэбит оргууй сыҕарыҥнаан киирэн барда. Оргууй "баар" уонна "суох" диэн суруллубут тыллар икки ардыларыгар сыҕарыҥнаан баран, төгүрүгэр киирэн турунан кэбистэ. Хайдах эрэ уу-чуумпу буоллубут. Ким оҕону сэмэлээтэ, ким бүлүүһэни түҥнэри эргитэн ууран баран: "Бүтүөххэйиҥ!" - диэн этии киллэрдэ. Онон бүлүүһэлэнэн бүттүбүт.
Сарсыныгар Алтаҥҥа кэнсиэрдээн баран дьиэбитигэр төннүөхтээх этибит. Айан син уһун буолан уонна түүнү быһа бүлүүһэ "сүүрдүбүт" дьон сылайан, бары даҕаны нуктуу истибит. Трассаттан арахсан Алтанныыр суолга киирдибит. Ол курдук айаннаан иһэн суоппарбыт нуктаабыта дуу, суол халтараана дуу... Автобуспут хайдах эрэ ньылбы тэптэрдэ уонна оргууй "тэлээрэн" тахсан суол кытыытыгар ойоҕолуу соҕус, аана аһыллар гына, оргууй "сытынан" кэбистэ. Таһырдьа тымныы бөҕө турар. Трассаттан туора суолга ким кэлиэй... Хата туох да улахан саахал тахсыбатаҕа.
Кэлин бүлүүһэ сүүрдүүтүгэр баар оҕолор, били оҕо "чап" гыннарбытыйытыытын саныы түспүттэрин эппиттэрэ. Биһиги бары оргууй тахсан бөһүөлэк диэки ыстанныбыт. Хата, наһаа ыраах буолбатах этэ. Бары маҕаһыыҥҥа кутулла түстүбүт. Түргэн үлүгэрдтк трактор булан, автобуспутун гаражка состорон аҕалбыттара... Оччолорго тосол эҥин суох буолан радиатор уутун суоппар тута сүөкээбитэ. Ол курдук кэнсиэрдээн киэһэ дойдубутугар этэҥҥэ тиийбиппит.
А.Гаврильева. "Туймаада уоттара" хаһыат. Ахсынньы 15 күнэ, 2011 сыл.