Вероника Курчатова-Петрова
Мин дойдубар Тээнки диэн зимник баара, билигин быраҕыллан турар Тастыҥ быраатым онно эһэтин кытта кыстааччылар, ол саҕана 6 - 7 саастаах, дэриэбинэҕэ киирэ сылдьаары сылдьар үһү. Кыһын буолан эһэтин кытта биир улахан тахтааҕа куобах суорҕаннаах утуйаллара.
Арай биир сарсыарда быраатым куһаҕан баҕайы сыттан уһукта биэрбит, уутун быыһынан көрбүтэ эһэтин миэстэтигэр тахтааҕа туох эрэ кып кыра, 5 саастаах оҕо саҕа, хап хара, бүтүннүү түү сирэйдээх килэччи төп төкүнүк харахтарынан көрөн баран оҕонньор сытар үһү. Быраатым куттанан ыһыы-хаһыы бөҕөтүн түһэрбит, эһээтин ыҥырбыт. Ол оҕонньоро оҕо хаһыытын истэ истэ ыт курдук ырдьыгыныыр эбит. Эһээтэ кэлэн көрөн баран: "Уууу,нечистая!!! Опять..." (нуучча этэ) - диэн баран төттөрү тахсан баран хаалбыт... Быраатым куотуоҕун аны сатаан хамсаабат, кутталыттан ытыы - ытыы суорҕан анныгар сыта сатаан баран утуйан хаалбыт. Уһуктан көрбүтүгэр киһитэ суох.
Кэлин эбээтигэр кэпсээбитигэр: "Дьиэ иччитэ кэлэн барбыта буолуо, ол эһээҕэ көстөн ылар буолан аахыйбатаҕа буолуо, таайдахха, туох да куһаҕаны оҥорбот иччи" - диэбитэ.
Тээҥкигэ быраатым эһээтэ, Тофик өлүөн иннинэ кэлин сылларга соҕотох кыстыыр буолбута, кэргэнэ наар бөһүөлэккэ иһэр-аһыыр эмээхсин. Ол Тээҥкинэн оҕонньор тыыннаах эрдэҕинэ мэлдьи айан дьоно, дальнобойщиктар тохтоон ааһааччылар, хонооччулар эҥин үһү. Өлөр сылыгар ол айанньыттар ардыгар дьиэтин таһыгар хара күлүктэри көрөр буолтара, сөҕөн аҕай биэрээччилэр, Тофикка кэпсээтэхтэринэ оҕонньор күлэн эрэ ылааччы. Ол курдук эһээбит туһунан өр баҕайы истибэккэ сылдьыбыппыт, биирдэ дьоммуттан тыына быстыбыт диэн иһиттим, дальнобойщиктар дьиэтин иһигэр өлө сытарын булбуттар. Дьонум көмө барбыттара, кэлэн баран тетям кэпсиир: "Дьиэтигэр аан мааҥнай киирдим, сып-сытыган сыт ымалыйда, ол эрэн туох сыта кэлиэй, тохсунньу тымныытыгар... Дьиэтэ тоҥон хаалбыт этэ. Сөхтүм аҕай, ол да буоллар барытын сиэри - туому тутуһан, кистээри сырыттыбыт... Иккис күнүгэр арай мин хоһугар сытан эрэн баттаттым, арай сытан эрэн харахпын аһан көрбүтүм Тофик илэ бэйэтинэн турар. Мин кутталбыттан өйбүн сүтэрэ сыстым, харахпын төттөрү симэн кээстим, одуулуу аҕай турарын курдат билэбин... Ол кэннэ оҕонньор өрө тыынна, уонна эттэ: "Эээх вы, долго были..." - диэн баран суох курдук буолан хаалла. Уһуктан биэрдим, "һуу - һаа" диэбиттии табахтаан баран төттөрү утуйан хааллым. Ол курдук кистээтибит. Барарым саҕана арай хараҕым кырыытынан көрдөхпүнэ оһох аттыгар хара күлүк олорор. Түргэн үлүгэрдик тахса охсон массыынам иһигэр киирдим... Ол курдук мин санаабар кута хаалан хаалбыт, хомойбуттуу бараахтаатаҕа анараа дойдуга..." - диэн кэпсээтэ. Эбэм эмиэ сөбүлэстэ. Өлөрүгэр сүрэҕэ хам ылбыт, сууллан түспүт быьылаах, муостанан барахсан сыылла оронугар сатаабыт, ол курдук тыына быстыбыт диэбиттэрэ.
Кэлин сылларга дальнобойщиктар ааһан иһэн ыраахтан дьиэтин уота умайан турарын уонна турбатыттан буруо тахсарын көрөллөр үһү.
Vkontakte.ru "Иччилээх кэпсээннэр" группаттан.