Аня Егорова

Мин бу ыйга оҕом иhэ ыалдьан балыаhаҕа сыппыппыт. Онтукайбыт адьас былыргы тутуу дьиэ (хап-хара, туора түhэн хаалбыт истиэнэлэрдээх) аттыгар чуп чугас морг турар.

Бастакы күннэргэ үчүгэйдик хоннубут, уолум температурата 40 буолан бэрийэртэн соло буолбатаҕым, сотору соҕус ыаллыы палатаҕа сытар дьахтар хайдах утуйаҕын диэн ыйыппыта, ону "үчүгэй" диэбитим. Тоҕо ыйыттын диэбиппэр кыыhым: "мин баттатан аанньа утуйбатаҕым хас да хонно" - диэбитэ, мин ону өссө улахаҥҥа уурбатым. Арба "санузел" диэн суох сирэ, ол иhин таhырдьа туалекка тахсабыт, оҕоҕун дьиэҕэ тааска ииктэтэн баран бэйэбит тоҕобут, морг уонна туалеппыт бу сэргэhэ тураллар, онно дьэ күнүстэри түүннэри сүүрэкэлээhин. Ол сырыттахпына биир киhини моргтан покрывалаҕа суулааннар таhааран иhэллэр, ону көрөн этим тымныйан хаалла, ырдьайбытынан төттөрү балыыhабар киирдим. Куттанабын да син биир кыhалҕаттан кэлин тахсабын, онно өссө бочкаҕа били отходтарын умаппыт буолааччылар...
Сарсыныгар арыгылаан өлбүт чүөчэ өлүгүн аҕылбыттара.
Дьэ ол түүн баттаппытым, арай көрдөхпүнэ палатабар биир орто саастаах чүөчэ биһиги оҕобунаан сытарбытын өрө манаан турар эбит. "Туох чүөчэтэ буоллаҕай" - дии саныыбын да сатаан саҥарбаппын, онтон эмискэ ороммут бас өттүгэр баар буола түhэр уонна эргитэн ылан атахпытыттан таҥнары соhоттуур, ону өрөлөhөбүн, уолбун ыксары тутан куотан тахсабыт. Эмискэ уhукта биэрэбин, өр буолбакка хараҕым эмиэ симмиллэн барар, дьэ эмиэ оннук таҥнары соhоттуу сатыыр.күүспүнэн уhукта сатыыбын, уолуйан туран кэлбитим уолум ынчыктыы сытар, ону аргыый туруораммын уоппун уматтым. Сарсыарда 4 чаас буолан эрэр этэ, куттаммытым ааспакка этим уута сүүрэн музыка холбоон баран олордубут, уолум утуйан халла, бэйэм сарсыарданан утуйбутум. Туран баран сиэстэрэҕэ эппиппэр "уоккутун холбоон утуйаарын" диэбитэ, уонна саҥарбата. Ол кэннэ икки хонон баран тахсыбыппыт.

Күннэй Дьяконова

Дьүөгэм оҕотунаан оройуон балыаһатыгар сыппыттара, ол эргэ соҕус тутуу дьиэ. Киэһээ ийэлэр оҕолорун утутан бараннар таах сэһэргэһэллэр, иннэ гынан сэлэһэн бүтэн баран хосторунан тарҕаспыттар, хоско биирдии эрэ буолан сыталлар эбит. Арай биир түүн хаһыы-ыһыы бөҕөтө буолбут, бары туох буоллай диэн сүүрэн кэлбиттэр, онуоха ол хаһыытаабыт ийэ ытыы - ытыы оҕотун кууһан олорон кэпсээбит: арай, түүн хос иһигэр ким эрэ отой атын киһи туох эрэ диир саҥата иһиллибит, ону тыаһырҕаан уоту холбообута арахса турар үһү, онтон эмискэ ыалдьа сытар оҕото ытаан киирэн барбыт, ийэ уоскутаары оҕотун көтөҕөөрү гыммытыгар эмискэ илиитэ тымныйан хаалбыт, уонна оҕотун хайдах эрэ салгын атаҕыттан көтөҕөн муннук диэки тардар эбит, нэһиилэ былдьыы тардан ылбыт. Ону сиэстэрэлэр төрүт да надыйбатахтар, оннук буолуохтааҕын курдук туттубуттар. Арай биир атын аһаҕас эттээх ийэ баара: "манна өлбүт дьон куттара сылдьар" диэн эппит.

Дмитрий Федоров

Урут дэриэбинэбит эргэ балыыhата баар эрдэ5ҕинэ аҕаhым кыра уолунаан сыппыттар. Сайын. Арай туран (атын ыарыhах суох, кинилэр иккиэлэрэ эрэ үһү) биир киэhэ уола (3 - 4 саастаах) утуйбутун кэннэ ийэтэ киинэҕэ ду танцыга ду баран хаалбыт. Арай түүн үөһэ балыыhа аттыгар олорор оҕонньор чэпчэтинэ тахсыбыта, балыыса аттыгар кыра оҕо ытыы - ытыы сүүрэкэлии сылдьар үһү. Тыый хайаларын оҕото буоллаҕай диэн кэлбитэ, оҕото утары сүүрэн кэлбит. Дьиэҕэ ынырык эмээхсин баар куоттум, маамам баран хаалбыт диэхтиир үһү. Сотору эдьийим кэлэн абыраабыт. Оҕонньор сэттэтин ылбыт (мөхпүт). Ийэм эмиэ дэлби саҥарбытын өйдүүбүн. Ол оҕо билигин этэҥҥэ кэргэн, оҕо - уруу буолан олорор. Кыра этим аанньа өйдөөбөппүн, кырдьаҕас баҕайы эмээхсин хостон тахсан мин диэки кэлэн иhэрин эрэ өйдөөн хаальыппын диирэ. Тиксигэ олорор.

Vkontakte.ru "Иччилээх кэпсээннэр" группа.