Дьэ, биир кэпсээни кэпсиим. Ааҕан, сэргэҕэлээн көрүҥ, баҕар, ким эмэ манныкка түбэспитэ буолаарай?
Илиибин эчэтэн, ыйы быһа балыыһаҕа тиэстэн таҕыстым. Оройуоммут балыыһата олус эргэ. Хардыы аайы муостата хаачыргыыр, истиэнэтэ иҥнэйэн хаалбыт. Эмтэниэх оннугар киһи кутун-сүрүн баттатар, төттөрүтүн, ыалдьыах курдук. Биир күн эбиэт саҕана кэлэн хааллым, ким да балыыһаҕа суох этэ. Хайыахпыный, иллэҥ киһи хаһыат ааҕа-ааҕа кэтэһэн олордум. Саас буолан, аан аһаҕас турар, таһырдьа тыас-уус, дьон кэлэрэ-барара барыта иһиллэр, массыына тыаһыыр.
Ол олордохпуна хараҕым кырыытынан ким эрэ ааспыта көһүннэ, онтон аттыбар кэлэн олордо уонна: «абытыый-абытай, итиитин...» диэтэ. Мин хаһыаппын халыҥ таастаах ачыкым нөҥүө нэһиилэ ааҕан кыҥастаһа олорон, аат эрэ харата «ээх» эрэ диэтим. Хаһыакка, били, «Штыров бэрэсидьиэннээн бүппүт үһү» диэн сонуну ааҕаат, аттыбар олорбут киһибэр этээри, «көр эрэ, бу киһибит эмискэ баҕайы...» диэн этэн иһэн хайыспытым – киим да суох! «Бай» диэт, соһуччута бэрдиттэн хаһыаппын сиргэ түһэрэн кэбистим. Билигин аҕай ким эрэ аттыбар аҕылыы олорбута, итииттэн ыараханнык тыынара иһиллэрэ. Абааһы көрөммүн, ыскамыайкаттан туран быраастарбын таһырдьа кэтэстэҕим үһү. Ити кэннэ балыыһаҕа эрдэ кэлбэт буолбутум,
Автора суруллубатах. http://www.kyym.ru - сайттан.