Оҕобунуун дьиэбитигэр хаалан, ас астанан аҕабытын кэтэһэбит. Оҕобут үһүн ааспыт. Аҕабыт күн аайы киэүэ тоҕус саҕана биирдэ үлэлээн кэлэр. Оҕобор оонньуурдарын тэлгэтээт, көбүөргэ олортум, бэйэм сандалыбын тарда сырыттым. Хостон оҕом тугу эрэ бэйэтин кытта кэпсэтэрин иһиллээн турдум.
«Аҕаа, абытай, абытай. Ийээ, аҕабыт абытай-абытай буолбут» диир. Мин наһаа соһуйдум. Тута кэргэммэр эрийдим. Кэргэним төлөпүөнүн ылбатаҕыттан сүрэҕим ытырбахтаан ылла. Оҕом аны ытаан киирэн барда. Мин итинниккэ тµбэспэтэх киһи буолан, олус куттанан, оҕобун кытта тэҥҥэ ытаһа-ытаһа, кэргэммэр эрийэ сатаатым. Ол тухары төлөпүөнүн ылбатыттан ыксаатым-ыгылыйдым. Оннук ытыы олордохпуна кэргэним эрийдэ. «Сэгээр, билигин тиийиэм, сыҥаахпын быһа түһэн, ону тиктэрдим, иһэбин» диэтэ. Мин уоскуйан, оҕобун кууһан олордум. Бачча кыра киһичээн хантан сэрэйбитэ буолла? Кэргэним ытаабыппын көрөн ыйыппытыгар барытын кэпсээн биэрбитим. Кэлин умна быһыытыйбыппыт. Оҕобут улаатан оскуолаҕа киирбитэ.
Бастакы кылааска үөрэнэ сылдьан биир күн оскуолаҕа барбаппын диэн ытаата, хаппырыыстаата. Мин атаахтыыгын диэн, сэмэлээн көрдүм, аанын сапта-сапта ытаата. Тоҕо барбаккыный диэтэхпитинэ «барыахпын баҕарбаппын да бүттэ» диэхтээтэ. Кэбис дии санааммыт, кэргэмминиин сүбэлэһэн баран, оскуолаҕа илдьибэтибит. Ол күн истибиппит, оскуолаҕа баһаар тахса сыспыт этэ. Кэргэмминиин бэйэбитин эрэ көрсөн хаалбыппыт. Оҕобут аһаҕас эттээх эбит диэн сэрэйэбит. Ардыгар кыратык куттанабын.
Маша И. - http://www.kyym.ru - сайттан.