Ааспыт үйэ 60-с сылларыгар Дьокуускайга биир киһи уокка оҕустаран, өлөн хаалар. Сиэр быһыытынан, 3 хоннорон баран көмөллөр. Ол киһилэрэ хоруопка сытан, тиллэн кэлбит. Ол кэннэ маннык буолбут.
Били «өлбүт» киһи уһукта биэрбитэ – ыас хараҥа, кып-кыараҕас, салгына суох, тымныы сиргэ сытар. Үрдүгэр тугу эрэ саайар тыас иһиллибит, онтон көтөҕөн эрэллэрэ биллибит. Син балай да тугу эрэ хачыгыраппыттар. Били эрэйдээх хайыай, туох буоларын эрэ күүтэн сыппыт. Эмискэ сырдык тыкпытыгар, салгын киирбитигэр киһибит олоро биэрбит. Көрбүтэ, икки киһи куотан эрэллэр эбит. Арааһа, көмүс биһилэҕин, сыаналаах чаһытын ылаары, ханнык эрэр ороспуонньуктар хаһа сатаабыттар быһыылаах. Киһибит кылабыыһаҕа сытарын, дьэ, өйдөөбүт. Тута дьиэлээччи киһи буолбут. Тиийээт, ааны тэлэччи аспыта – кыракый уолчаана турар эбит, аҕатын үөрэ көрсүбүт, кууспут, ийэтин ыҥырбыт. Ийэлэрэ түгэх хоско тугу эрэ гына сылдьан өҥөйбүтэ – кэргэнэ барыйан турар эбит. Дьахтар барахсан көрбүтүн итэҕэйбэккэ сүрэҕэ хайдан, тута өлөн хаалбыт. Инньэ гынан өлөөччү тиллибит, көмөөччү өлбүт...
БАСХААЙ кэпсээннэрэ. http://www.kyym.ru - сайттан