Маҥайгы 90-с сыллардаахха буолбут. Биир уол ким эрэ уһугуннарбытыгар туран кэлбит. Баттаттым дии санаабыт, сатаан утуйбакка сыппыт. Арай хос муннугар туох эрэ маҕан элэҥниир үһү. Хараҥа буолан кыайан көстүбэтэх. Ол кэннэ ол маҕана аан диэки сыҕарыйбыт. Таһынааҕы көрүдүөр уота сырдаппыта – маҥан таҥастаах кыыс аа-дьуо хааман тахсан барбыт уонна баанна диэки ааһа турбут. Уол киммит сырыттаҕай диэн батыһан тахсан бааннаны көрбүтэ – ким да суох үһү. 

 

Иккис түбэлтэҕэ кыргыттар түбэспиттэр. Кыргыттар утуйа сыттахтарына, уоттара холбонон кэлэр үһү, чаанньыктара оргуйар, маллара-саллара тыаһыыр үһү. 

 

Үһүс түбэлтэни биһиги олоруохпут иннинэ олорбут уолаттар кэпсээбиттэрэ. Биир уоллара аһаҕас эттээх буолан күн аайы илэ көрөр үһү. Түүн мэлдьи үс саҕана туран кэллэҕинэ, кыыс хос ортотугар олорор, ардыгар уолаттар аттыларыгар турар буолара үһү.

Ити курдук кэпсээннэри истээт, куттаммыппытын да иһин, барар-кэлэр, хонор дьиэтэ суох устудьуоннар хайыахпытый, сирбэккэ-талбакка олорор буоллахпыт. Хоспутугар 3 буолан олоробут. Кыра уолбут Сережа олус куттас. Ол «кыыс» туһунан кэпсээри гыннылар эрэ, кулгааҕын саптан баран сытар эбэтэр хостон тахсан баран хаалар. Уолбутун бэйэбит даҕаны дьээбэлии сатаабат, куттаабат этибит. Сүрэх ыарыһахпын диэн сэрэтэн, кини баарына тугу да кэпсэтэ сатааччыбыт суоҕа.

 

Биирдэ табаарыһым Айхал түүн ортото миигин уһугуннарда. Уум быыһыгар туран туох буолбутун туоһуластым. Кырабыт утуйан буккурата сытар этэ. Иккиэн куукунаҕа тахсан олордубут. Уолум сирэйэ-хараҕа турбут. Олус куттаммыт сирэйдээҕэ, субу уйадыйыахча. Атаһым итинник буолбутун хаһан да көрбөтөҕүм, маҥнай күлүү гыныахпын баҕарбытым. Онтон киһим уоскуйаат, маннык диэн кэпсээтэ.

 

Утуйа сыттаҕына ким эрэ туруорбут. Баттатабын дии санаан, иккистээн утуйбут. Бу сырыыга ким эрэ атаҕыттан тарпыт. Уолаттарым дьээбэлэнэллэр дии санаабыт. Арай турбута – хос ортотугар олоппоско кыыс олорор үһү. Хаһыытыыр да кыаҕа суох, куттанан, суорҕанын иһигэр киирэн хаалбыт. Ол кэннэ кинини суорҕан нөҥүө эмиэ ким эрэ таарыйбыт. Айхал ойон тураат, миигин уһугуннарбыт.

 

Сережабытыгар бу түбэлтэни кэпсээбэтэхпит. Үс күн ааспытын кэннэ, утуйа сыттахпытына, үһүөн туох эрэ улахан тыастан уһуктан кэллибит. Таһынааҕы хостор тыаһыыллар диэн аахайбатыбыт. Онтон хас эрэ мүнүүтэнэн «Тефаль» чаанньыкпыт холбонон кэллэ! Айхал тута уоту аспыта – ким да суох. Олорон эрэ бу хоско олорбоппут диэн сүбэлэспиппит. Сарсыныгар сайабылыанньа суруйбуппут уонна атын хосторунан «зайчиктаабыппыт». Баахтаттан туоһуласпыппытыгар маҥнай билбэтэҕэ буолбута. Онтон кэлин итиннэ олорбут кыыс уолун кытта этиһэн баран, хос иһигэр бэйэтигэр тиийиммит үһү. Каникул буолан, хас да күн буолан баран биирдэ булбуттар.

 

ГРИША. http://www.kyym.ru - сайттан