Дьокуускай куоракка улааппытым. Быраас үөрэҕин этэҥҥэ бүтэрэн, куоракка биир сыл үлэлээбитим кэннэ, Новосибирскайга ыҥыран ыллылар. Биир сыл үлэлээн көр диэтилэр. Үчүгэй үлэ, усулуобуйа, үрдүк хамнас көрөннөр, тута сөбүлэстим. Кэргэммин, оҕобун илдьэ бардым. Уопсайга икки хостоох дьиэ биэрбиттэрэ даҕаны сөбүлэспэтэхпит. Ол иһин куорат киинигэр биир чэпчэки дьиэни куортамнаабыппыт. Олус чэпчэки сыаналаах буолан, үөрэн-көтөн, сууйан-тараан, сырдык, үчүгэй көстүүлээх гынан астыммыппыт. Ол курдук, биир нэдиэлэ олорбуппут.

Үлэбин, кэлэктииппин, саҥалыыы куораты сөбүлээммин, чэ биир сыл олорон көрүөх дэстибит. Иккис нэдиэлэбитигэр оҕобут сөгүүн утуйбат, түүн аайы хаһыытаан уһуктар, ытыыр этэ. Аанньа утуйбакка үлэбэр, аат эрэ харата барарым, үлэм эппиэтинэһэ сүрдээх буолан, кэргэним миигин уһугуннарбакка оҕону уоскута сатаахтыыра даҕаны, табыллыбатаҕа, тугу эрэ көрөр дуу, ким эрэ кымаахтыырын дуу курдук ытыыра. Оҕобутун аһынан хайдах да буолуохпутун билбэккэ, түүннэри балыыһаҕа барарбыт даҕаны, туох да биричиинэ суох буолан ыыталлара. Оҕобут балыыһаҕа тиийээт уоскуйан хаалара, утуйан барара. Ити курдук иккис нэдиэлэбит олус ыараханнык ааста.

Биир күн үлэбэр тардыллан докумуоннары бэрийэ олорон, остуолга сытан утуйан хаалбыппын. Кэргэним хаста да эрийбит эбит. Ыксалынан «Туох буолла?» диэн ыйыппыппар маккыраччы ытаабыт, куолаһа титириир «хана сылдьаҕыный, кэлиий түргэнник, биһиги таһырдьа турабыт, дьиэҕэ киирбэппин» диэтэ. Дьиэбэр хадах тиийбиппин да өйдөөбөппүн. Кэргэннээх оҕом барахсан таһырдьа тураллар. Оҕом холку этэ, онтон кэргэммин маҥнай билбэтэҕим. Ытыы сылдьар, сүгүн саҥарбат. Дьиэҕэ киирээри гыммыппын төрүт киллэрбэт. Ол иһин үлэбэр бардыбыт, ким да суох буолан хоспор олордубут, чэй кутан кэргэммин уоскуттум. Ас астыы сырыттаҕына оҕо эмиэ ким эрэ кымаахтыырын курдук иэрийэ иэрийэ ытаабыт. Хоһугар киирбитэ – күлүк курдук сип синньигэс киһи барыйан турар, уоттаах харахтарынан оҕону көрөр үһү. Онтон кэргэним хаһыытаабытыгар сылыпыс гынан хаалбыт.

Кэргэним барахсан нэһиилэ кэпсээбитэ, хаһан да итинниги көрбөтөх киһи тута өлүөх этим, оҕом баар буолан, кинини быыһаары туттунан, аллараа хайдах түспүппүн бэйэм да билбэккэ хаалбытым диир.

Ити күн тута атын дьиэҕэ көһөн,тахсан барбыппыт. Хаһаайынтан туоһулаһа сатаабыппын эппэтэҕэ, «ону – маны толкуйдаамаҥ» диэбитэ

Федор К. Кулун тутар 30 күнэ 2017 сыл. «Кыым» хаһыат.