Арай биирдэ биир киhи утуйа сытан, суорҕанын ким эрэ былдьаhарыттан уhуктубут. Арай өйдөөн көрбүтэ суорҕан буолбатах, бэйэтин барааҥка соно эбит. Уонна өссө эбиитин сытар буолбатах олорор эбит. Дьэ киhибит өйдүү сатаабыт, ханна-ханна ото маhа-суох сиргэ арыгылыы сылдьан тиийэн хаалбытын. Тула ыас хараҥа, им-дьим.
Өссө да кур киhи сэниэлээх соҕустук иннин диэки ойон туран хардыылыах буолбута, туох эрэ олоппосторугар иҥнэн охто сыспыт. Илиитинэн бигээн туох да хара баhаам элбэх олоппос баарын билбит. Син өйүгэр бээhээҥҥи күнэ кыламнаан ааспыт да, бу диэн ханна баарын өйдүү охсубатах. Син онон-манан быыс булан көрүдүөр омоонун булан батыспыт. Онтон кып-кыра туруору баҕайы кирилиэhи дабайбыт. Тахсыбыта көбүс-көнө муостаҕа кэлбит. Дьэ бээhээҥҥи хартыына онон-манан дьиримнээн ааспыт. "Ама, манна хаалан хаалбыт буоллаҕым дуу" - дии санаан, итэҕэйбэккэ дорҕоонноох соҕустук "Ким баарый" - диэн саҥарбыта, өй дуораана буолан бара турбут. Бабат-татат! Чахчы кулуупка киинэ кэнниттэн хаалан хаалбыт эбиппин диэн өйдөөбүт! Оччоҕо соммун ким тардыаласта? - диэн өй кыламнаабыт да, тахсар аан диэки охто-охто, сүүрэр хаамар икки ардынан, истиэнэ кытыытынан бигэнэн саалаттан тахсар ааҥҥа иҥниэх курдук буолан иhэн, элбэҕи толкуйдуу барбакка, тоҕо тэбэн ааhа турбут. Фае муостата түннүгүнэн киирэр ый сырдыгыттан ылы-чып көстө сытар эбит. Дьэ кулууптан тахсар ааҥҥа тиийэн, биир ааны алдьаттым, аны маны алдьаттахпына киhини хаайыыга ыытыахтара-диэн толлон тахсыбатах. Ситэри манна аан боруогар олорон кэтэhэргэ санаммыт. "Халлаан да ырааппыт быhылаах, сотору харабыл игин кэлэр ини" - дии санаабыт. Арай ол олорон истибитэ, бэт ыарахан баҕайы атах тыаhа сыана үрдүгэр хаама сылдьара иhиллибит. Саппыкыта соhулла-соhулла хааман тиийэн били кини олорбут ыскамыайкатын талыр гына көннөрөн ааспыт. Уонна кэлэн били биhи киhибит тоҕо тэппит аанын саба сатаан тыас бөҕөнү таhаарбыт. Ол тухары киhибит дөйө-таалан олорбут, баҕар миигин көрбөккө ааhыа диэн. Ууп-уhун фае муостата барыта ытыска уурбут курдук көстөр эбит. Онон кэллэҕинэ да көрөн куотан биэриэм диэн эрэх-турах сананан олорбут. Били күтүрэ кинини көрөр курдук, аргыый аҕай хааман кэлэн бильярд остуолугар тохтообут. Киhибит кыҥыы сатаабыт да, фае түгэҕэ түннүгэ суох буолан көстүбэт эбит. Дьэ доҕоор, күтүрэ бильярд шаригын ылан муостанан төкүнүтэн тахсар аан диэки бырахпыт. Онтуката кэлэн, биhи киhибит олорор боруогун аннынан барар батарея турбатыгар кэлэн, хатан баҕайытык охсуллубут. Киhибит кутталыттан ойон туран тахсар ааны туох баарынан тэбиэлээн барбыт. Били күтүрэ тохтоло суох элбэх мээчиги ыыталаан киирэн барбыт. Хас биирдии мээчик кэлэн турбаҕа саалыннаҕын аайы, мэктиэтигэр дьиэ истиэнэтэ хайа ыстаныахча тыаhаан барбыт. Киhибит син аанын тоҕо тэбэн тахсан барбыт. Сарсыныгар хочуолунай оhоҕун кэннигэр ытаан сыцсыйа турарын булбуттар. Өйүнэн улаханнык хамсаан, кырдьыар диэри син олороохтообута, бөөлүүн түүн куhаҕан буолбутун истэн, бэйэтэ омунура-омунура кэпсээбитин суруйдум.
Vk.com сайттан. Александр Николаев суруйуута.