Үтүө киэһэнэн. Бу түбэлтэ буолбута ыраатта. Бу орто дойдуга биһиги эрэ баар буолбатахпыт, билбэппит элбэх. Ол иһин өбүгэлэрбит сиэри-туому тутуһан, киһилии олоҕу олорорго модьуйдахтара.

Дьэ, биир ыйдаҥалаах түүн, үлэбиттэн дьиэлээн иһэн ыттартан куттанан начальнай  оскуола корпуһун иннинэн бардым. Ыйдаҥалаах буолан фонарикпын умаппатым. Начальнай оскуола аана балачча улахан күлүүһүнэн хатанан турара. Биллэн туран уот-күөс суох.  Оскуола ойоҕоһунан бардым. Дьэ,  оскуолаттан тэйэ баран истэхпинэ,кэннибэр күүскэ да күүскэ түннүгү тоҥсуйан дибигирэтэр тыас иһилиннэ. Наьаа соһуйдум.  Оскуола аана хатааһыннааҕын өйдөөн кэллим. Оскуолаҕа алҕаска оҕону хатаан кэбиспиттэр дии санаат төттөрү эргийдим. Түннүктэр бары уота суохтар. Шторалара сабыылаах. Ким да баара биллибэт. Өйдөөбөккө балачча көрөн турдум. Арай эмискэ кытыыга баар түннүк штората күүскэ баҕайы ортотунан аһылла түстэ. Онно өйдөөн көрбүтүм дьахтар турар. Хайдах эрэ ырыган сирэйдээх. Төбөтө түргэн - түргэн баҕайытык хамсыыр. Эмискэ дьэ этим тымныйа түстэ да, дьиэм диэки сүүрүүнэн бардым.

Vk.com сайттан. Куннэй Дьяконова суруйуута.