Уруй–айхал! Мин биир олоххо буолбут дьикти тугэни кэпсиэхпин баҕарабын. Киhи олоҕор ардыгар уйулҕаны хамсатар, таайбараҥ, тылынан быhаарыллыбат, мүчүк гынан араас дьикти түбэлтэлэр буолуталаан ааhаллар. 

Күн–дьыл элэстэнэн аастаҕын аайы урут буолбут түгэннэр умнуллан иhэллэр, онтон бу кэпсиир түбэлтэм төhө да үйэ аҥара сыл ааспытын үрдунэн умнуллубакка көлүөнэттэн–көлүөнэҕэ кэпсэнэн билиҥҥэ диэри уостан түспэт.

Ол курдук бу түбэлтэ сэрии бүтүөн ахай иннинэ Мөҥүрүөн нэhилиэгэр (билигин Мэҥэ–Хаҥалас хоту уhуга) буолбут. Эдэркээн уонча саастаах Маайа кыыс балаҕанын таhыгар тахсан убайын Мииккэни сэрииттэн кэлэрин кэтэhэн өргө диэри кэтээн турар идэлэммит. Биир сарсыарда эрдэ күн тахсыыта сааhыары Маайа кыыс куобах бэргэhэтин кэтэн таhырдьа тахсан айан суолун одуулаан турбут. Маайа кыыс сүрэҕэ тугу эрэ сэрэйэрдии күүстээхтик тэбиэлээн барбыт. Арай хараҕын симириктэнэн көрдөҕүнэ алаас арҕаа уhугуттан биир киhи ыксаллаахтык хааман иhэр эбит. Кыыс эндэппэккэ ким буоларын сүрэҕэ таайбыт. Төhөлөөх өр кэтэспитэ буолуой, Маайа кыыс биир баар суох тапталлаах убайын. Маайа ол алаас түгэҕиттэн хааман иhэр убайыгар кини эбит диэн хараҕын уутун сотто–сотто утары сүүрэр. Чугаhаабыта кырдьык убайа Мииккэ эбит. Кыыс барахсан ''Убаай... Мииккээ...'' диэбитинэн ахтыбыта бэрдиттэн ытаабытынан барар. Убайа барахсан олус ыран илистэн кырдьыбыт көрүҥнэммит эбит. Мииккэ уун–утары сүүрэн кэлэн балтытын Маайаны кууhан ылар. Ол сылаастык көрсүһүү тымныйан хаалар. Убайа Мииккэ хайдах эрэ тыбыс тымныы эбит, Маайа кыыс ону санаатыгар тоҥмута бэрдиттэн буолуо диир. Арай Маайа убайын синиэлнэй барааҥка сонун тимэхтэрин ыкка ардыларыттан сырдык көстөрүн дьиктиргии көрөр. Убайа барахсан балтын уоскутан баран этэр: "мин аны кэлбэппин, аhыйыма миэхэ ыарахан, мин эйиигин таптыыбын", – диир уонна төттөрү барардыы эргиллибитигэр көхсө суох эбит. Маайа кыыс ону көрөн сарылаабытынан балаҕанын диэки кэннин хайыспакка сүүрэ турар. Киирэн тулаайах кыыhы бэйэтин (Маайаны) иитэн олорор кырдьаҕас балыксыт оҕонньорго Сүөдэргэ кэпсээн биэрэр. Ону оҕонньор өрө тыынан эрэ кэбиhэр. Маайа тулаайах кыыс, ийэлээх–аҕата уонна убайа Мииккэ сэрии содулуттан суох буолбуттара. Ол түбэлтэ кэннэ Убайын туhунан туох да сурах кэлбэтэҕэ. Маайа барахсан сааhыран олох тиhэх суолуттан барыар диэри убайын Мииккэни кэтэhэрэ.

Василий Стручков суруйуута. http://vk.com сайттан. Сэтинньи 7 күнэ 2010 сыл.