Былыр-былыргыттан чуор кулгаахтаахтар уоту истэллэрэ. Истибиттэрин сөпкө тойонноотохторуна, кырдьык буолар эбит.
 

Хоноһо кэлээри гыннаҕына, эһэкээн хайдах киһи кэлэн эрэрин, саҥатин-иһэтин үүт-үкчү үтүктэн, иһитинэриэн сөп. Саҥата-иҥэтэ түргэн-тарҕан буоллаҕына, уот эмиэ хоноһо курдук саҥаран-иҥэрэн, тыас таһаарыан сөп.

Халлаан хаардыах уонна ардыах буоллаҕына, кутаа уокка таммах түһэн сырдырҕатарын курдук иһиллээччи. Эһэкээн элбэҕи эрдэттэн биллэриэн сөп. Уоту өйдөөн истэр дьоҕур арааһа, барыбытыгар баар буолуохтаах. Ону улахаҥҥа уурбакка, итэҕэйбэккэ, саһан сылдьаахтыыра буолуо.

Дьоммун кытта уот инигэр киэһээҥҥи аһылыкпытын аһыы олорбуппут. Аһаан туран истэхпитинэ, оһохпут сүр улаханнык дэлби барн эрэр курдук тыаһаат, аана мас уурар хаайбаҕа - тимир лиискэ кэлэн түспүтэ.

Дьонум: "Оһоххо ботуруону дуу, бөстүөнү дуу бырахпыккын, онтуҥ эстэн, сии сыста!" - диэн, дэлби мөхпүттэрэ-саҥарбыттара. Ол күн оһоҕу мин ттубутум эрээри, сыыһа-буора суох ыраас оһох инигэр маспын киллэрбитим. Отторбор тугу да сиппийэн аҕалан оһоххо хаалаабатаҕым.

Уум кэлбэккэ өрө мөхсө сыппытым. Саҥа нухарыйан истэхпинэ доҕоор, дьиэбит эркинэ титирэстиэр диэри дэлби барар улахан тыас иһиллибитэ. Ытыс таһынар хараҥабыт күн тахсан эрэрин курдук, эмискэччи кып кыһыл буола түспүтэ!

Мин ороммуттан ыстанан тураат, таһырдьаны көрөөрү, түннүккэ сыста түспүтүм. Дэриэбинэ оскуола диэки өттө сүрдээх улахан кутаа кытыастан эрэрин курдук сырдаан көстөрө!

Дьоммун уһугуннараат, таһырдьа ыстанан тахсыбытым, уот диэки тэбиммитим. Суолга тахсыбытым, оскуола диэки буолбакка, хочуолунай уонна кулууп икки ардыгар хап хара буроурлаах туох эрэ умайан күүдэпчилэнэн эрэрэ.

Буут быстарынан сүүрэн тиийбитим, хочуолунай конденсат кутуллар систиэринэтин аттыгар турар уматык таһар массыына умайан кытыаста, көлөһөлөрө "ытыалыы" турара! Уот суоһа отой чугаһаппат этэ.

Кэлин истибиппит, ол массыына суоппардара конденсаттарын сүөкээн бүтээт, тимир көлөлөрүн систиэринэттэн тэйиппиттэр. Хата, ол иһин уот обургу систиэринэни сиэбэтэх. Суоппардар киирэн докумуон толорсо уонна иттэ олорбуттар. инньэ гынан быыһаммыттар. Биһиги ол тиийэн турдахпытына, хаалбыт көлүөһэлэрэ "ытыалаабыттара".

Ити түбэлтэ кэнниттэн мин, били, оһох иһигэр дэлби барбыт тыас-уус биллибитин бэркиһии, сөҕө-махтайа саныыбын. Эһэкээн эрдэттэн сэрэппит эбит. Ол аата, туох буолуохтааҕа барыта эрдэттэн биллэр курдук дуу...

Бүөтүр БӨТҮРҮӨП. "Кыым" 28.03.2013