"Уу аттыгар олорон мээнэ ону-маны элбэхтик кэпсэппэт куолута. Истибэт - истиэҕэ, көрбөт - көрүө дииллэрэ" диэн эбэм өрүү харыстыыр үгэстээҕэ.
Биһиги кустуу диэн ааттаан. айманан-сайманан сылдьар кэммит этэ. Улахан эбэҕэ тиийэн "аһаан-сиэн" чалбааттаан, оннооҕу олохтоохтору аймаабыппытыттан маннык түбэлтэҕэ түбэспиппит дии саныыбын.
Ол олорон, бэйэ-бэйэбитин хаадьылаһан: "мин оннук сатаан ытабын, мин оннук ыраахтан, оччону-баччаны, куһу-хааһы биирдэ эрэ ытааччыбын!" диэн арбана-арбана, мэскэйдэнэ олорбуппут. Арай кэннибитигэр МЦ 21-12 сааталахха таҥнары ыйанан туран, эстэн өрө хабылла түспэт дуо?!
Билигин аҕай киэбирэ олорбут киэппит, күүстээх тыалга көтөр түүтэ ыһылларыныы, бурҕас гынан хаалбыта! саҥабыт-иҥэбит наар көрдөһөр-ааттаһар диэки халыйаахтаабыта...
Эстибит саа кутааттан тэйиччи этэ. Уот суоһуттан эһиннэ диэҕи, күлүк сиргэ турбута. Ким эрэ дьээбэлэнэн ытта диэҕи, бэһиэн кутаа уот иннигэр олордохпутуна эстибитэ. Хата, кими да доробуонньук таарыйбатаҕа.
Саа биһии туһаайыыбытынан эстибитэ буоллар. доруоп барыбытын да таарыйыах эбит этэ. Онтон бэттэх ол саанан ким да ыппатаҕа. Арай алдьаммыт саалаах дьон бытархайчаастарын тоноон бүтэрбитэрэ.
Онон улахан эбэлэр кытылларыгар олорон, толоостук кэпсэтэргитин, "аһыыргытын-сиигитин" тохтотуҥ!.
Бүөтүр БӨТҮРҮӨП. "Кыым" 28.03.2013.