Таһырдьа ичигэс. Халлаан былыттара күнү кыра-кыралаан бүөлээн ылаллар. Туманнаах курдук, хараҥаран эрэр киэһэлик соҕус. Куораппыт дьүһүнүн сүтэрбиккэ дылы. Көрөрбөр барыта сиэрэйдиҥи хараҥа, дьиэлэрбит хараарыҥнаан, адаарыһан тураахтыыллар.
Дьоннор, ким үлэтигэр ыксыыр, ким мээнэ күүлэйдиир. Анньыһа-анньыһа, туохтан эрэ матан эрэр курдук утары хаамыталыыллар. Ааһан иһэр дьон сирэйин өйдөөн көрөөччүгүт дуо? Үксэ кыыһырбыт, модьуйбут, барытыттан сылайбыт харахтардаахтар. Сороҕор көрөҕүн ис иһиттэн үөрбүт, сырдык мичээрдээх, киһи хараҕар быраҕыллар дьоннору. Онтон бу күн тоҕо эрэ бары норуокка барытыгар траур биллэриллибитигэр дылы. Мин бу быыһыгар эмиэ сиэрэй общество иһинэн күннээҕи олоҕум былааннарын төбөбөр сааһылыы-сааһылыы хааман истим.
Ойуунускай аатынан уулуссаны туораары суол «дьүкээбилин» кэтэһэн турабын («Дракон» клуб таһа). Наҕыллык, ыксаабакка хааман истэхпинэ…Биир кыыс утары иһэр эбит. Сахаҕа маарынныыр, ол эрээри атын омук эмиэ диэххэ сөп. Үлтү сордоммут дьүһүннээх, хараҥа бодолоох. Киһи аатыттан тахсыбыт көрүҥнээх. Таҥаһа суох, ол оннугар биинтэни түөһүгэр баанаахтаабыт. Үлтү илдьирийбит, тырыттыбыт. Этигэр онон-манан көҕөрбүт суоллар бааллар, арычча урукку соҕус быһылаах. Илиитигэр улахан кытаран хаалбыт баастааҕын өйдөөн көрдүм. Баттаҕа сууйуллубатаҕа ырааппыт буолан быыллыйан, хайдах дьүһүннээҕин да сатаан быһаарбатым. Умса көрөн баран асфальт суолунан атах сыгынньах мин утары суолу туораахтаан иһэр эбит. Бу кыыһы аһынным. Уонна тоҕо эрэ ыйыттым: «Көмөлөһөбүн да?»- диэн. Кыыьһым олус соһуйда, уонна киниэхэ эппиттэрин итэҕэйбэтэх харахтарынан миигин одуулаан турда. Ыарахан баҕайы, эрэйдэммит сыллара сирэйигэр көстөргө дылы. Уонна эттэ: «Миигин көрөҕүн дуо?!»- диэн. Мин эппинэн кымырдаҕастар сүүрбүттэрин курдук, атаҕым түгэҕиттэн төбөм оройугар дылы тоҥон хааллым. Хайдах эрэ куттанным аҕай. Аттыбар сылдьар дьон ким даҕаны өйдөөн көрбөт эбит ол кыыһы. Саатар бэйэм соһуйаммын атаҕым ип - илибирэс буолла. Кыыһым: «баһаалыста миэхэ көмөлөс, көмөлөс…» дии - дии абааһы кыыһын курдук арбаллан утары сүүрэн кэллэ. Кэтэһэ турбакка туох баарбынан куоттум, дьиэм диэки. Кыыһым кэннибиттэн сарылыы - сарылыы эккирэтэ хаалла. Мин дьиэбэр киирэн кыра оҕо курдук суорҕан иһигэр киирэн кутталбыттан салыбырыы-салыбырыы сыттым. Харахпын симэбин күүскэ. Баҕар утуйа сытарым буолуо, оччоҕуна уһуктуом диэммин. Оннук сыттахпына тымныы салгын сирэйбин үрэр. Хос иһигэр күһүҥҥү салгын саба биэрбитигэр дылы буолла. Куттана - куттана бытааннык суорҕаммын арыйдым. Көрбүтүм киһи быһыытын курдук салгыҥҥа уста сылдьар былыт турар эбит. Уонна кыыс куолаһа иһиллэр: «Баһаалыста, баһаалыста» дии - дии тугу эрэ көрдөһөр. Мин «Суох, суох, БАР, БАР киэр буол!!!» өлөрдүү хаһыытаатым. Куоласпын бэйэм да билбэтим. Олох тугу да көрүөхпүн, да тугу да истиэхпин баҕарбатым…
«Сүт, сүт, сүт…Баһаалыстаа, баһаалыстааа» Ботугуруу, ботугуруу уһуктан кэллим. Хоспор утуйа сытар эбиппин. Сарсыарда күн тахсан, таһырдьа сырдаан эрэр эбит. Үлтү мэхсүбүппүн, суорҕаным сиргэ сытар, бэйэм салыбыраабыппын аҕай. Хата түүл эбит диэн үөһээ улаханнык тыынан ыллым. Түүлбүн төбөбөр эргитэн ыла ыла сыттым. Муодарҕаатым аҕай. Аҕабынан эбээм билгэлиирэ киирэн ылла дуу дии санаатым. Кини миэхэ дэлби кэпсээччи, кыра эрдэхпинэ. «Миигин өрүү харыстыыр, абырыыр түүлбэр көстөр иэйэхситтээхпин» диэччи. Киһи сатаан быһаарбат кистэлэҥ күүһэ бу сиргэ элбэх быһылаах дии саныыбын…
http://vk.com сайттан. Кыыдаана Игнатьева суруйуута