Суодьаах ыкса киһитэ Хаһыырар Атыыр Мэйиитэ диэн сиргэ олохсуйбут. Кини Кыырт Ыйаабыкка олорор ынахсыттары уонна отчуттары күн тахсыыта дьиэтин таһыгар тахсанхаһыытаан уһугуннарар идэлээх эбит.

Оттон Хабах ойуун  ону "киһини сүгүүн утуппат" диэн сөбүлээбэт эбит. Устунан өстүйэр, түмүгэр тиийэн өлөрөргө сорунар. Түүн утуйа сыттаҕына сүгэнэн төбөтүн быһа охсоору оҥостор. Ол гынан баран, Хаһыырар утуйарыгар хараҕын көрө, быччыҥа тардыалаан түүннэри мөхсө сытар киһи эбит. Хабах хаста да холонон көрөн баран куттаммыт. Онон ойуун абааһытынан дьалбыттарыах буолан саанар. Бу дьон биир сиргэ батыһан олоруо суохтар диэн, Суодьаах Хаһыырары туспа тэрийэн, Босхоҥ ойуун, Сымыыт диэн дьону сыһыаран Сартаҥ үрэҕэр. билиҥҥи Арыылаах нэһилиэгин сиригэр арааран көһөрөр. Кинилэр бастаан Кыыкынайдаах, Хайбааҥкылаах диэн сиргэ олохсуйбуттар. Онтон улам тарҕаммыттар. Хаһыырар сыдьааннара кэлин сүрэхтэнии буолбутугар Ефимовтар, Слепцовтар, Аммосовтар диэн араспаанньаламмыттар. Оттон нэһилиэктэрэ уруурҕаһан Дьуһаал диэн ааттаммыттар. Ол курдук, Дулҕалаах - 1 Дьуһаал, Сартаҥ - 2 Дьуһаал диэннэр.

"Кыым" хаһыаттан. 2009 сыл кулун тутар 26 күнэ. И.С. ЮМШАНОВ, Верхоянскай куорат, Горохов В.А. "Суордаах нэһилиэгэ" кинигэтиттэн