Түөрт сүүстэн тахса сыллааҕыта Дьааҥыга Суодьаах диэн киһи кэлбитэ үһү. Сылгы, ынах сүөһүлээх, элбэх чаҕар, бөҕөс дьоннордоох кэлэн Дулҕалаах үрэҕин таҥнарбыт. Бастакы тохтообут сирэ Хайыкаан диэн.

Онно балачча уһуннук олорбут. Суодьааҕы кытта Хаһыырар диэн чугас аймаҕа дуу, доҕоро дуу кэлсибит. Итини таһынан, мэлдьи бииргэ сылдьар Хабах диэн ойууннаах эбит. Хайыкааҥҥа кэлэн олохсуйан баарн Кубалаах уонна Сатаҕай икки ардыларыгар (билигин ону ону талах саба үүммүт) үчүгэй хонууга ыһыах ыспыт, онно наһаа чааҕыр-мындыр ойуулаах сэргэни туруорбут. Ол сэргэтэ букатын кэлиҥҥэ диэри туран баран охтубут. Ону Хабдьаас (Николай Васильев) оҕонньор хаттаан туруорбута эмиэ охтон сытар сурахтааҕа. Итинтэн чугас Алта Муннук диэн сиргэ Суодьаах кулунун сэлэтин  сэргэлэрэ бааллара.

Суодьаах Дулҕалаахха улам олохсуйан,тоҕойдорго дьиэ-уот туттан, ол аайы ынахсыттарын, сылгыһыттарын тарҕатан олордон испит. Ол курдук, Буор Ураһа, Булгунньахтаах, Атыыр Мэйиитэ, Олдьо Төрдө диэн сирдэргэ ууланан уһуннук тохтообуттар. Суодьаах бэйэтэ икки салҕааһын иҥэһэнэн мииниллэр улахан аттааҕа үһү. Ол атын өлүгүн Хайыкааҥҥа ытыгылаабыт. Бэйэтин уҥуоҕа Олдьо Төрдүгэр Ырыа Хайатын хотугу уһугар баар дииллэрэ.

Суодьаах тус бэйэтин ыччаттара сүрэхтэнии кэмигэр  Ефимовтар уонна  Слепцовтар диэн буолбуттара үһү. Хабах ойуун Хадыһа Билии диэн сир томторугар, ойуур ортотун алыҥаҕар  араҥастаммыта. Кини араҥаһын икки тиитэ охтубут этэ, иккитэ турбутунан кууран, араҥаһын маһа, харамтатын сороҕо сонно бааллара. Билигин ол ойууру бүтүннүүтүн уот сиэбит. Көлүөһэп Байбал диэн киһи Хабах төбөтүн уҥуоҕун үлтү сынньан, бороһуок курдук үлтү мэлийэн сылгыны эмтиирэ үһү.

"Кыым" хаһыаттан. 2009 сыл кулун тутар 26 күнэ. И.С. ЮМШАНОВ, Верхоянскай куорат, Горохов В.А. "Суордаах нэһилиэгэ" кинигэтиттэн.