1. Былыр мааны, баай ыал кыыһа, ойоҕо өллөҕүнэ, туоһунан суулаан тэбиэх мас оҥорон, онно уган иин хаһан буорга көмөллөр. Бэйэтин көмүстээх-симэхтээх мааны таҥаһын таҥыннаран көмөллөр, ол кэннэ бэйэтин кытта ымыйалаах арыы, кымыс уураллар, аттаах буолаллар, атын сэбилээн-ыҥыырдаан, симээн (ат сэптээх) туспа иин хаһан, онно толору кутаа уот оттон баран аты тыыннаахтыы умса анньан сонно көрөн туран убаталлар.

2. Кийиит дьахтар аҕатын аахтан эригэр сүктэн кэлиитигэр аҕалбыт энньэ-сэтии кулутун, дьахтар өллөҕүнэ тыыннаахтыы буорга көмөллөрө үһү (ат ыҥыырдааччынан).

3. Ол кэннэ былыр, өлбүт киһини 6-8 баҕана туруоран көҥдөй дүлүҥҥэ уган үөһээ араҥастыыллара үһү. Оннук араҥастар бу кэлиҥҥэ дылы туралларын өт уота сиэтэлээн бараннылар. Араҥаһы нуучча миэрэтэ буойан, ууратан наар буорга кистии буолбут.

Дьөгүөрэп, Хабарылла Лэгэнтэйэбис, 80 саастаах, Уолба нэһилиэгэ Таатта оройуона. Уолба. Кулун тутар 19 к. 1936 с.

Сэһэн Боло. Лиэнэҕэ нуучча кэлиэн иннинээҕи олоҕо. Бичик, 1994.