Куобарап, Миитэрэй Мэхээлэйэбис (олоҥхоһут), 88 саастаах, II-ис Өльтөк нэһилиэгэ Уус Алдан оруйуона.

Олуйа, атырдьах ыйын 14 к. 1934 с.

Татаар омук баһылыга, Уордаах Мамаай

Саха төрдө буолбут Омоҕой Баай, Эллэй Боотур дөксө бу дойдуну саныы, манна кэлэ иликтэринэ соҕуруу, арҕаа нуучча омугу сибиир татаара, Уордаах Мамаай ыраахтааҕы кырган, отут төгүрүк сыл сэриилээн кыайар кэмигэр нуучча баайдарын, Мамаай баһылык сэрииһиттэрэ, кини уола Боҕомиэт Бухатыыр кырган, нуучча баһылыктарыттан хара саарбаттан, күндү таастан бастыы ылар буолта тирэнэр.

Уордаах Мамаай сэриитин баһылыга Хоруол Батыый буолан нууччаны сэриилээн, кыайан-хотон, олоҕун олох оҥостор, баайын-дуолун бас билэр, Сибиири Татаар бас билэр, онно олохтоох омуктар сэрииттэн үтүрүллэн үрүө-тараакөтүү-түһүү, буолаллар.

К.Ө. Боппуоп, Илин-Хаҥалас (урукку лууһун Хачыкаат нэһилиэгин олохтооҕо С.П.Б.-в диэн сэһэнин Д.И. Меликов суруйбутуттан.

Олунньу ый, 1921 с.
 

Урааҥхай дойдута, Байкаал күөл

Саха төрүттэрэ төрүкү олохторуттан урааҥхай дойдутуттан, улу моҕуоллар Батыый диэн баһылыктаах сэриилээн ыган кииттэриттэн үтүрүллэн сүөһүлүүн-астыын, баайдыын-дуоллуун уларыйан, көһөн Байкал күөл тулатыгар олохтоох бэрээт омуктары кытта бииргэ булкуһа өр сыл, күн олорон иһэн өстөһөн - саастаһан, бэрээттэри кытта кыргыһан, кыаттаран арҕаалы-хот күрүүргэ-тэскилииргэ баартара.

Силэпсиэп, Бүөтүр Силиипэбис, 72 саастаах, Бахсы нэһилиэгэ Чурапчы оруйуона (Урукку Мэҥэ улууһа).

От ыйын 19 к. 1934 с. Көмүк.
 

Өстөһөн-саастаһан

Саха төрдө буолбут Омоҕой Баай, Эллэй Боотур (эбэтэр Эр соҕотох Эллэй Боотур диэн) бу дойдуну (Өлүөнэни) була иликтэринэ срҕуруу татаар омук сиригэр олоотторо үһү.

Ол кэмҥэ брааскай омук Омоҕой Баай татаар омук сиригэр олорон, онно олохтоох омуктары кытта өстөһөн-саастаһан атах мэнээк күрээн Бүлүү, Өлүөнэ өрүһүн булан кэлэр. Эллэй Боотур Омоҕойу батыһан кэнниттэн кэлэр.

Бэстэрэкиэп, Охонооһой Өндүрэйэбис (Мандыс уола), 65 саастаах, II-иc Курбуһах нэһилиэгэ Уус-Алдан оройуона.

От ыйын 20к. 1934 с. Уорумтаҕай сайылык.
 

Өстөһөн-саастаһан

Срҕуруу брааскай омук, Омоҕой Баай дтэн олохтоох дьонун - сэргэтин кытта өстөһөн - саастаһан, төрүөбүт дойдуларыттан күрээн бу дойдуну, Бүлүүнү, Өлүөнэни булар.

Бөтүрүөп, Уйбаан Уйбаанабыс (Кыам уус), 64 саастаах, I-эй Болоҕур нэһилиэгэ Чурапчы оройуона.

Балаҕан ыйын 21 к. 1933 с. Чурапчы сирэ.
 

Кыргыһыыга кыаттаран

Аҥхара өрүскэ олохтоох брааскай омук олохтооҕо Омоҕой Баай дтэн өһө - сааһа элбээн, улуу уоттаах кыргыһыыларга кыаттаран, дойдутуттан хоту Бүлүүнэн Өлүөхүмэҕэ кэлэн олоҕурар.
Кини кэнниттэн хайа омуга биллибэт, Эллэй Боотур диэн кэлэр.

Мөлөкүүрэп, Өлөксөй миитэрэйэбис (Үльльэр), 62 саастаах, Аччаҕар нэһилиэгэ Чурапчы оруйуона.

Кулун тутар ыйын 1 к.1935 с.
 

Чыҥыс Хаан кыргыһыытыттан

Одун Чыҥыс Хаан улуу уоттаах кыргыһыыта туран, араас омук бииһин ууһа олорор олохторуттан уларыйан, араас үрэх бастарынан түһүтэлээн үрүө-тараа бараллар. Ол кэмҥэ элбэх буруйу - аньыыны оҥороллор, кыргыһыыга кыаттаран саха төрүттэрэ олорор олохторуттан тэйэн, үрэх бастарын булуталаан күрүүргэ бааттара.

Боппуоп,Кирилэ Силиипэбис, 58 саастаах, Хатылы нэһилиэгэ Чурапчы оройуона.

Олунньу ый 15 к. 1936 с., Чурапчы дэриэбинэтэ.
 

Уордаах ыраахтааҕы эккирэтиититтэн

Саха төрдө буолбут Оноохой Уол диэн төрүөбүт дойдутугар уоран, өлөрөн баппатах. Ону уордаах ыраахтааҕы эккирэтэн ыар буруйу-сэмэни бэрдэрэргэ соруммутун билэн, өһө-сааһа элбээн, буруйа-сэмэтэ ыараан Наҕан Түһэҥэй диэн балтыныын элбэх буоланнар олорор олохторуттан (брааскай истиэптэн) арҕаалыы-хоту күрүүргэ бараллар. Ол Оноохой Уол бу Өлүөнэҕэ кэлэн Омоҕой Баай диэн буолар.

Сэһэн Боло. Лиэнэҕэ нуучча кэлиэн иннинээҕи олоҕо. Бичик, 1994.